Максим ва Муслим Абдуселимоврин бинеяр СтIал Сулейманан райондин Агъа СтIал-Къазмайрин хуьряй я. Армиядин жергейра къуллугъ авурдалай кьулухъ кьве стхадини икьрардин бинедаллаз уьлкведин Яракьлу Къуватра къуллугъун давамарун кьетIна. Украинада кьиле физвай махсус серенжем гатIунайла, сержантдин чинда авай Муслим Луганскдин, чIехи стха Максим (младший лейтенант, ротадин командир) — Донецкдин областриз рекье туна.
Ватанпересвилин руьгь кваз чIехи хьанвай кьве стхадини чпин хиве тунвай везифаяр намуслувилелди кьилиз акъудзава. Абурун кьегьалвилер къуллугъзавай частарин командиррин къулар алай грамотайралди, медалралди ва маса шабагьралди къейднава.
И йикъара ял ягъиз хайи хуьруьз хтанвай Абдуселимовриз чкадин мектебдиз «Жуьрэтлувилин тарсуна» иштиракун патал теклифнавай. Мярекат мектебдин тербиядин рекьяй завуч Шамсият Ханвердиевади кьиле тухвана. СВО-дин иштиракчийри серенжем кьиле физвай гьаларикай, аскеррин игитвилерикай авур ихтилатри муаллимриз, аялриз екез таъсирна.
Гуьгъуьнлай баркаллу стхайрал кьил чIугваз абурун кIвализ хуьруьн клубдин директор Альберт Гьажиев, ктабханадин заведующий Халижат Къарабегова, аялрин яратмишунрин кIвалин заведующий Сабина Муталибова атана. Абуру Ватандин къуллугъда акъвазнавай кьегьалриз сагърай лагьана, дяве куьтягь хьана, дуьньяда ислягьвал хьун алхишна.
Замир Мегьамедов
