Сентябрдин эхирра заз Южно-Сухокумск шегьердин электромеханический заводдин генеральный директор Жалилов Залбега машиностроителрин суварин межлисдиз теклифнавай. Директордин кабинетда куьруь суьгьбет авурдалай гуьгъуьниз цIахурви Сейидали Гьажимусаева (РФ-дин лайихлу муаллим, Залбег Къагьировичан дуст) шегьердилай цIар илитIун теклифна.
НафтIадин буругъар себеб яз арадал атанвай шегьер я Южно-Сухокумск. Иниз кIвалахиз Дагъустандин гьар са пипIяй атай фялейрикайни устIаррикай шегьер арадал атана 67 йис хьанва.
Шегьердин администрациядин кьил чи патарай я лагьайла, зун сифте адал кьил чIугваз фена.Чина милайим хъвер авай жегьилди зун шаддиз кьабулна ва чун таниш хьана. Амни гьазур хьанвай заводдин суварик физ.
Мамадов Сеидагьмед Сефербеговичан буба табасаранви, диде кьурагьжуван руш яз хьана. Захъ галаз ам чи чIалал рахана.
Табасаран райондин Гуьгьряг хуьре дидедиз хьайи Мамадова мектебдилай гуьгъуьниз Волгограддин МВД-дин Академия акьалтIарна. 2008-йисуз Дербент шегьердин ГОВД-да силисчи яз кIвалахна.
Тежриба хьанвай Мамадов Сеидагьмеда ахпа Табасаран райондин прокурордин заместитель яз зегьмет чIугуна, вахтуналди прокурордин везифаярни кьиле тухвана. Са арадилай адакай Дербент шегьердин прокурордин куьмекчи хьана. Арадай са акьван вахт фенач, Мамадов РД-дин прокуратурадин управленидин начальниквиле тайинарна. Гьина кIвалахнатIани, жегьил пешекарди алакьунар аваз, къанунрин бинедаллаз зегьмет чIугуна. Мамадован нетижаяр акурла, РФ-дин генеральный прокурорди 2018-йисуз ам 1-классдин советникдин чин гана, Южно-Сухокумск шегьердин прокурорвиле тайинарна.
Мамадов Сеидагьмеда шегьерда прокурорвилин везифаяр намуслувилелди кьиле тухуз хьана. Ина, са бязи маса чкайра хьиз, пара шулугъар, тахсиркарвилер авач. ЦIусад агъзурдав агакьна агьалияр яшамиш жезвай шегьерда вири миллетрин векилар тир инсанриз чпиз чеб хъсандиз чида ва абур пара гьуьрметлу я. Тахсиркарвал авун ина еке айиб яз кьазва. Вад йисан къене и шегьерда тахсиркарвилер вахтунда вири дуьздал акъудна. Коллективдин патай адаз еке гьуьрмет авай, гьикI лагьайтIа, Мамадов кIвалах истемишдай къилихрин кас я.
2023-йисан 7-мартдиз Мамадов Дагъустандин Кьил Сергей Алимович Меликова вичин советниквиле тайинарна. 2023-йисуз ам Южно-Сухокумск шегьердин администрациядин кьилин къуллугъдал хкяна (шегьердин депутатрин собранидал сесер гана).
2023-йис Мамадов Сеидагьмед патал лап важиблуди хьана. Южно-Сухокумск шегьер арадал атана 67 йис жезвай. И вакъиа шад гьалара къейдна кIанзавай. Ада вичин команда галаз са куьруь вахтунда вири патарихъай гьазурвилер акуна. Сифте шегьерда михьивал туна, куьгьне тарар атIана тазабур кутуна, цуьквер цана паркар безетмишна. Рекьер цIийи хъувуна, куьчеяр эквламишна. Ахпа жемят галаз сувар кьиле тухуз майдандиз экъечIна.
Меркездай, районрай, суварик иштиракиз, гьукуматдин векилар, депутатар, общественный деятелар, ярар-дустар, багърияр атанвай. «Лезгинка» ансамблни.
Южно-Сухокумск шегьерда гьелелиг гьял тавунвай месэлаяр пара ама. Нукьсанар арадай акъудиз алакьдай ксар къвалал алаз кIвалахзава къе Мамадова. Къенин кар пакадал вегьин тийиз, шегьер абад авунихъ ялзава.
Шегьердин даях ва дамах электромеханический завод я. Ана къе 130 касди кIвалахзава. Мажибарни хъсанбур я. Заводдин директорди, вичин патай куьмек яз, шегьердин Нефтяникрин тIварцIихъ галай куьче къайдадиз хкидай къарар кьабулна, и кардал мукьуфдивди машгъул хьанва.
Шегьердал гьамиша спонсор М. Гиндиеван куьмекчи гъил ала. Ам Дагнефть — Русснефтдин гендиректор я. Мадни шегьердин къамат абурлу хьун патал меценат Эсембулат Магьамедова, Гьажи Махачеван фондуни ва гьакI маса ксарини алакьдай куьмекар гана.
Зи фикирдалди, нафтIадин булахар авай шегьер фадлай къизил шегьердиз элкъвена кIанзавайди тир. Умуд кутазва хьи, са вядеда Южно-Сухокумск шегьерни аваданлудаз элкъведа.
ЧIимел югъ тиртIани, суварик квай инсанрин рикIера гатфар авай. Мэрдини заводдин пешекарриз сувар мубаракна ва пишкешар гана.
Зун а межлисдай суварик иштиракзавай манидар Мадина Шагьмурадовадин манийрин сесер япара аваз хтана… Къуй Дагъустандин гьар са пипIе гьамиша шад межлисар хьурай.
Бикеханум Алибегова
