26-октябрдиз «Мегьарамдхуьр-Ахцегь-Рутул» шегьре рекье арадал атай авариядин нетижада Дагъустандин дишегьлийрин союздин председатель Интизар Асадуллаевна Мамутаева телеф хьана. Ам авай машин, шегьре рекьяй акъатна, бетондин цла акьуна: дишегьли чкадал телеф хьана, машинда авай мад пуд кас духтурханадиз аватна.
И.А. Мамутаева 1951-йисан 27-июлдиз Рутул районда дидедиз хьана. Ада жуьреба-жуьре йисара ВЛКСМ-дин райондин комитетда кьвед лагьай секретарь, Дагъустандин Госсоветда комиссиядин жавабдар секретарь, республикадин аялрин ихтиярар хуьнин рекьяй тамам ихтиярар ганвай векил яз кIвалахна. Эхиримжи йисара ам Дагъустандин дишегьлийрин союздин председатель тир.
И.А. Мамутаевадин хизанриз, мукьва-кьилийриз башсагълугъвал РД-дин Кьил Сергей Меликова, РД-дин Гьукуматдин Председатель Абдулмуслим Абдулмуслимова, РД-дин Халкьдин Собранидин Председатель Заур Аскендерова ва масабуру гана.
«Интизар Асадуллаевна викIегь, датIана гьерекатдик квай, чарадан гьалдикай хабар кьадай халис дагъви дишегьли тир. Ада вичин вири уьмуьр Дагъустандизни дагъустанвийриз бахшна. Адаз хайи Ватан гзаф кIандай. Хайи чилихъ авай муьгьуьббат ада кьиле тухузвай гьар са кардай, гьар са кIвалахдай аквадай. Интизар Асадуллаевнадин экуь къамат чи рикIера амукьда», — къейдна Сергей Меликова.
Дагъустандин Кьилин Указдалди Интизар Мамутаевадиз яргъал йисарин гьакъисагъ зегьметдай (кьейидалай кьулухъ) Дагъустан Республикадин I дережадин Гьуьрметдин орден гана.
«Лезги газет»
