28-октябрдиз Махачкъалада футболдин «Динамо» клубдин президент, Олимпиададин къугъунрин чемпион­, Россиядин лайихлу тренер Гьажи Гьажиеван 80 йисан юбилейдиз талукьарнавай межлис кьиле фена. Мярекатда иштиракай гьуьрметлу мугьманрин арада Дагъустандин Кьил Сергей Меликов, Россиядин машгьур тренерар тир Валерий Газзаев, Станислав Черчесов, Юрий Семин ва масабур авай.

Юбилейдин межлисдал рахадай чIавуз Сергей Меликова РФ-дин Президент Владимир Путина Гьажи Гьажиеван юбилейдихъ галаз алакъалу яз рекье тунвай Тебрикдин тел кIелна ва уьлкведин регьбердин патай машгьур футболистдиз 80 йис тамам хьун мубаракна.

«Гьуьрметлу Гьажи Муслимович! Юбилейриз савкьатар гваз атун адет я. Зунни къе и мярекатдиз ичIи гъилер гваз атанвач. Зи ва «Динамо» клубдин патай и багьа пишкешни ктаб кьабула. Ина куь уьмуьрдикай, дустарикай, кьиле тухвай акъажунрикай, гъалибвилерикай гзаф итижлу макъалаяр, шикилар, рикIел хкунар гьатнава. Квехъ чандин сагъвал, яргъи уьмуьр хьурай. Куьн чаз лап герек я!», — лагьана республикадин Кьили, Гьажи Гьажиеваз юбилей мубаракдайла.

Гуьгъуьнлай, мярекатдин сергьятра аваз, Гьажи Гьажиеван тIварцIихъ гзафбуру текбрикдин гафар лагьана. Чпин рахунра абуру машгьур тренердин алакьунар, пешекарвал, агалкьунар къейдна. Спортдин «Динамо» обществодин кьилин советдин председателдин заместитель Толстых Николая Гьажи Гьажиевав обществодин къизилдин медаль вахкана.

Мярекатдикай гегьеншдиз РД-дин Кьилин Администрациядин ТГ-каналдай кIелиз жеда.

Агьмед  Магьмудов