Махсус серенжемдикай

РФ-дин Яракьлу Къуватри Полтавадин областда ВСУ-дин махсус кьушунрин дестедиз ягъунар кьуна. Идакай 28-октябрдиз «РИА Новости» чешмеди хабар гана.

Къейдзавайвал, а десте Британияда вердишарнавайди тир. Мидяди яшайишдин объектрал ийизвай гьужумриз жаваб яз, Россиядин кьушунри анжах женгчияр, техника ва маса уьлквейрай гьакъидихъ кьунвайбур, гьакIни оборонадин промышленность, военный маса идараяр алай чкайриз ягъунар кьазва.

ВСУ-ди яшайишдин объектрал, улакьрал дронар ахъаюнин гьерекатар давам жезва. 28-октябрдин йифиз Брянскдин областда пассажирар авай автобусдал дронди гьужумна, ам гьалзавайди кьена. Областдин губернатор Александр Богомаза вичин телеграм-каналда хабар гайивал, вад касдиз хасаратвилер хьана. Ада алава хъувурвал,  ислягь агьалийрал гьужумун ВСУ-ди давамарзавай инсансузвилин рехъ я.

РФ-дин оборонадин министерстводи 27-октябр­диз малумарай делилралди, СВО кьиле тухунив эге­чIайдалай инихъ Россиядин Яракьлу Къуватри Украинадин 668 самолет ва 283  вертолет, зенитный ракетайрин 633 комплекс, пилот галачиз лув гудай 92925 аппарат, 25710 танк ва дяведин маса машинар, РСЗО-дин 1607  машин, артиллериядин ва маса 30822 яракь, военный махсус 45045 автомашин тергна.

Россиядин такьатар гуз кIанзава

Евросоюздин кьиле авайбуру Россиядин активрин гьисабдай Украинадиз кредит гунин месэла «вахтунинди» яз гьисабзава. Идакай «Politico» чешмеди хабар гузва.

«Вилик акъвазнавай месэла процент алачиз такьатар вугунинди ваъ, а такьатар мус агакьардатIа, гьадахъ галаз алакъалуди я», — лагьанва Европадин чиновникди. Адан гафаралди, кьил алачиз кредит гудай фикир ава, амма гьелелиг вахт тайин хьанвач.

Чешмеди тестикьарзавайвал, Евросоюзди Россиядин активрин гьисабдай Украинадиз куьмекар гуниз аксивалзавай уьлквеяр и кардиз мажбур авунин кьуьруькар акъудзава.

Брюсселда кьиле фидай нубатдин мярекатдал ЕС-дик квай вири уьлквейри Украина патал са шумуд миллиард евро умуми бурж яз вугун теклифун мумкин я. Амма им хаталу рехъ яз гьисабзава. Гьавиляй Европадин бязи чиновникри анжах Россиядин активар ишлемишун теклифзава.

Санал гьазурда

Хорватиядини Украинади оборонадин суьрсет санал туькIуьрунин патахъай икьрар тестикьарнава. Идакай Хорватиядин оборонадин министерстводи хабар гана. Малуматда къейднавайвал, оборона патал мадни гзаф яракьар арадал гъунин рекье кьве терефдиз санал кIвалахунин алакъаяр мягькемариз кIанзава. Идалайни гъейри, арадал гъайи суьрсет Хорватиядин хиве неинки вичин игьтияжар патал, гьакI Евросоюз ва НАТО патални маса къачун гьатзава.

Къецепатанбур тафаватлу я

Украинадин армиядиз къецепатан уьлквейрай гьа­къидихъ кьабулнавай аскеррал алай парталар ВСУ-дин хсуси аскеррал алайбурулай хъсанбур я. Ихьтин фикир «РИА Новости» чешмедиз Россиядин «Восток» кьушундин отделенидин командирди лагьана. «Къецепатан уьлквейрай кьунвайбурал ерилу парталар ала. ВСУ-дин кьушунра къуллугъзавайбуруз чпин уставдив кьур махсус партал ава, ам вирибуруз гузва. Чара­ уьл­квейрай атанвайбурун бронежилет адетдиндалай мягькемди, рюкзакни муькуьбурулай тафаватлуди я», — командирдин гафар гъизва чешмеди.

Ада алава хъувурвал, Россиядин аскерриз къецепатан уьлквейрин жетонар мукьвал-мукьвал жагъизва.

Яракьрин тарифна

США-дин президент Дональд Трампа уьлкведин кьушунрин, яракьрин тариф авуна. Идакай «РИА Но­вос­ти» чешмеди хабар гузва.

«США-дихъ дуьньядин тарихда виридалайни къуд­ратлу яракьлу кьушунар ава. Чи яракьлу къуватар масабурув гекъигиз жедач. Чахъ авай хьтин яракьар гьич садахъни авач, чун къвердавай мадни къуватлу жеда», — лагьана Трампа.

«Лезги газет»