Чуьхверхуьр арадал атунин тарихдикай малуматар авач. И хуьруьнни райцентр Кьасумхуьруьн арада 21 километрдин мензил ава. 1886-йисан переписдин делилралди, Чуьхверхуьре 59 майишат ва 330 агьали (178 итим ва 152 дишегьли) авай.
Сифтедай и хуьр райондин дагълух паюна, СалманкIам вацIун патав, Качалхуьруьвай 2,3 километрдин яргъа экIя хьанвай. Дагъустан Россиядин империядик акатдалди, Чуьхверхуьр Куьре ханлухдин Къутур-Куьре магьалдик квай. Ханлух Россиядин империядик экечIайдалай кьулухъ и хуьр Дагъустан вилаятдин Куьре округдин Къутур-Куьре наиблухдин Кьеанрин хуьруьн жемиятдик (общество) кваз хьана. 1926-йисуз хуьре 54 майишат авай, ам Хутаргърин хуьруьн советдик квай.
1966-йисуз хьайи гужлу залзаладилай кьулухъ хуьруьн агьалияр дуьзенлухдиз куьч хьана, ЦIийи Макьарин хуьр арадал атай чилел фена. Амма са шумуд йисалай абурукай са паяр кьилдин чкадал куьч хьана. ЦIийи хуьр «Ростов — Баку» шегьре рекьин патав рехъ тирвал яргъивилихъди Гуьлгери вацIун къерехда экIя хьанва.
Чуьхверхуьр ЦIийи Макьарин администрациядик акатзава. Алай вахтунда ина 312 кIвал ава, агьалийрин кьадар агъзурдав агакьнава.
Мурад Мегьамедкеримован
«СтIал Сулейманан район: тарихдин гелерай» ктабдай.
