Алай йисан 9 вацран къене зегьметдин рекьяй икьрарар кутIун тавуна кIвалахзавай 25 агъзурдалай виниз дагъустанвияр винел акъуднава. Идакай республикадин Гьукуматда вице-премьер Абдурагьман Магьумудован регьбервилик кваз кьиле фейи совещанидал малум хьана.
Адан кIвалахда РД-дин зегьметдин ва яшайишдин рекьяй вилик финин министр Мегьамедзагьид Кихасурова, Дагъустанда налогрин къуллугъдин регьбер Айдар Байрамова, РД-дин экономикадин ва мулкар вилик тухунин министр Гьажи Султанова, маса идарайрин жавабдар векилри иштиракна.
Санлай къачурла, алай йисуз «хъендикай» 25917 кас хкуднава. Нетижада абурукай 48 процентди, къанун-къайдадал амална, карчивал, 30 процентди текдиз кIвалахдай къайда (самозанятый) регистрация авуна, 20 процентди чпи кIвалахзавай чкайра зегьметдин рекьяй икьрарар кутIунна.
Къейд ийин хьи, налог тагуз, кIвалах кьиле тухузвайбур винел акъудун патал республикадин муниципалитетрани серенжемар кьабулзава. Совещанидал хабар гайивал, и жигьетдай Къизилюрт, Хасавюрт, Дербент, Махачкъала шегьерра ва СтIал Сулейманан районда кIвалах хъсандиз къайдадик кутунва.
Гегьеншдиз РД-дин Гьукуматдин сайтдай кIелиз жеда.
Чи мухбир
