Гьар йисан 15-октябрдиз къейдзавай хуьрерин дишегьлийрин международный­ йикъа жемиятдин рикIел  хуьрерин чкайра  яшамиш жезвай дишегьлийрин зегьметдин къиметлувал хкун лазим я. Къенин юкъуз чаз еке гьуьрметдиз лайихлу­ зегьметчи инсандикай, Мегьарамдхуьруьн райондин Гилийрин хуьряй тир трактористка Бахтина Будагьовна Балабеговадикай суьгьбет ­ийиз кIанзава. Адан зегьмет и йикъара Мегьарамдхуьруьн райондин кьилин везифаяр вахту­налди тамамарзавайди тир Нариман Эфен­диева рикIел аламукьдай медаль гуналди къейдна.

Бахтина Балабеговади Гилийрин хуьруьн «Ле­нинский» совхозда тракторист яз 15 йисуз кIва­лахна. Алай вахтундани ада хуьруьн майишатда зегьмет­ чIугун давамарзава, бегьер кIватIзавай вахтунда­ «Багъ» КФХ-дин багълара трактордал кIвалахиз экъечIзава.

Мектеб акьалтIарайдалай кьулухъ, жегьил руш яз, Бахтинади совхозда кIвалахна, трактор гьализ чирдай курсарикни экечIна. Гуьгъуьнлай ада Балабегов Эрзиманан хва Мирзебегахъ галаз кьисметар сад авуна. ИкI, абурун хизанда кьве тракторист хьана — уьмуьрдин юлдашдини яргъал йисара трактордал кIвалахна. Абурун хизанда пуд велед — са рушни кьве хва тербияламишна. Къенин юкъуз Бахтинани Мирзебег Балабеговар ирид хтулди шадарзава.

1984-йисуз Балабегова Бахтинадиз — зегьметчи классдин лайихлу векилдиз, жемиятдин патай  виниз тир къимет яз,  «Къизилдин къуьлуьн кьил» ганай. Чуьлдин зегьметчидин кIвалахдиз алай вахтундани еке къимет ава.

И мукьвара Мегьарамдхуьруьн районда­, республикадин «Самурдин зул» фес­ти­вал­дин сергьятра аваз, хуьрерин дишегь­лийрин йикъаз талукьарнавай мярекат кьиле фена. Анал Нариман Ражидинович Эфендиева Дагъустандин дишегьлийрин союздин председатель Интизар Мамутаевадихъ галаз санал Гилийрин хуьруьн виликан «Ленинский» сов­хоздин тракторист Бахтина Балабеговадиз Дагъус­тандин дишегьлийрин союздин «Ватандал рикI хьунай» медаль гана, тебрикдин келимаяр лагьана ва хайи чилин берекатлувал патал зегьмет чIугунин рекье мадни къуватар хьун  алхишна.

Чи  мухбир