Алатай гьафтеда Махачкъалада, тарихдин «Россия — зи тарих» паркуна, лезги чIалай 6-сеферда кьиле фейи диктант кхьинин мярекатда (ам Етим Эмин дидедиз хьайидалай инихъ 185 йис тамам хьуниз талукьарнавай) республикадин государстводин ва общественный деятелрихъ, алимрихъ, муаллимрихъ, яратмишунардай интеллигенциядин, са гафуналди, жуьреба-жуьре кеспийрин векилрихъ, студентрихъ галаз санал, лайихлу пенсияда аваз, ял язавай гзаф ксарини иштиракна. Абурун арада гьар йисуз диктант кхьизвайбурни авай. Ахьтинбурукай сад УФСИН-дин УИС-дин ветеран, къенепатан къуллугъдин отставкада авай подполковник Фазил Асланов тир.
Шад жедай кар мадни ам я хьи, алатай йисуз диктантда агалкьунар къазанмишайбурун, «5» къимет атайбурун арада Фазил Жумалиевични авай. Ам дипломдиз ва пулдин пишкешдиз лайихлу хьана.
— Заз жуван хайи лезги чIал багьа я. Ада зун и миллетдин векил тирди, зи хизандин ва халкьдин тарихдихъ авай алакъа къалурзава, — къейдзава ветеранди. — Диктант кхьини чаз жуван хайи чIалан гуьзелвал, девлетлувал мад сеферда гьиссдай мумкинвал гузва. Чна, чIехи несилдин векилри, хайи чIалаз, чи дувулриз къимет гузвайди къалурзава. Чна акьалтзавай несилдиз чалай чешне къачуниз, чIал кIан хьуниз, чируниз эвер гузва. Дидед чIал хуьник ва вилик тухуник жуван пайни кутунал за дамахзава. Жуьреба-жуьре динрин ва миллетрин векилар яшамиш жезвай чи уьлкведа и кардихъ еке важиблувал ава.
Филологиядивай яргъа тир Фазил Асланован мисалди тестикьарзавайвал, диктант «вадалди» кхьин патал кьилинди хайи чIалал рикI хьун ва, уьмуьрда хкянавай пешедилай аслу тушиз, жуван чирвилерин сергьятар гегьеншарун я.
ЦIи мадни абурлудаказ, хъсан тешкиллувал аваз кьиле фейи диктант кхьинин мярекатда, винидихъ къейднавайвал, Ф. Аслановани иштиракна. Къуй ветерандихъ и сефердани агалкьун хьурай!
А. Амирханов,
УФСИН-дин пресс-къуллугъдин начальник
