И йикъара Дагъустандин ОНК-дин (общественная наблюдательная комиссия) председатель Шамил Хадулаев ва адан заместитель Муслим Юнусов кьиле авай делегацияди Махачкъалада кардик квай 1-нумрадин силисдин изоляторда (СИЗО) авай ксарал кьил чIугуна. ИкI, силисдик квайбур авай шартIар ахтармишна, абурухъ гьихьтин месэлаяр аватIа чирна.

Жемиятдин патай гуьзчивалдайбу­рун комиссиядин­ членар Россиядин ФСИН-дин (Феде­раль­ная служба ис­полнения нака­за­­ний)­ Дагъустан Рес­публикада авай уп­равленидин­ началь­никдин УИС-да (уго­ловно-ис­пол­ни­тель­ная сис­тема) инсандин ихтияррал амал авунин рекьяй куьмекчи, къенепа­тан къуллугъдин полковник Руслан Исрафиловахъ ва СИЗО-дин начальникдин заместитель, къенепатан къуллугъдин подполковник Азнаур Аджиевахъ галаз санал дустагънавай ксарин шартIариз килигна, михьивилин жигьетдай гьалар, тIуьнрин ва медицинадин къуллугърин ери закондин истемишунрив кьадайвал теш­килнаватIа ахтармишна. ГьакIни силисдик квайбурухъ галаз рахана, абурухъ вучтин месэлаяр аватIа чирна.

— Чи макьсад изоляторда авайбурун ихтиярар чIуруниз рехъ тагуникай ибарат я. Гьатта азадвиликай магьрумнавайлани, инсандин ихтиярар хуьнихъ, законди истемишзавай къуллугъар (медицинадин куьмек, кфетлу тIуьн агакьун, камерайра кутугай шартIар хьун) таъминарунихъ важиблувал ава, — къейдна ОНК-дин председателди.

Гуьзчивалдай комиссиядин членар­ силисдин изоляторда тешкилнавай шар­­­тIарилай рази яз амукьна. Абуру михьивилин жигьетдай истемишун­риз жаваб гузвайди, медицинадин куьмек вахтунда агакьзавайди, сагъариз тежезвай азарар авай ксар датIана духтуррин гуьзчивилик квайди къейдна.

ОНК-дин ко­мис­сия­дин делегация­ди 1-нумрадин СИЗО-дин кьиле авай ксариз ачухвал ва и жуьредин серенжемар тухуниз гьазурвал къалурунай сагърай лугьузва. ГьикI хьи, абур инанмиш тирвал, арадал къвезвай четин месэлаяр анжах саналди тир ала­хъунрин нетижада гьялиз, суд-ду­вандин къурулушдин идарайра инсандин ихтиярар хуьнин дережа хкажиз жеда.

Къейд авун лазим я хьи, ОНК-дин комиссияди суд-дувандин къурулушдин идарайра гуьзчивилин серенжемар мукьвал-мукьвал кьиле тухузва, гьикI хьи, абуру УИС-дин идарайрин кIва­лахдин михьивал къалуриз, ихтибарвал хкажиз куьмекзава.

Рагнеда Рамалданова