Гьафтедин аварияр
6-октябрдилай 12-октябрдалди Дагъустандин рекьера улакьрин 25 авария арадал атана. Идакай МВД-дин госавтоинспекцияди хабар гузва.
ДТП-рин нетижада 2 кас кьена, 30 касдал (абурук 3 аялни ква) жуьреба-жуьре хирер-кьацIар хьана.
Рекьера машинар гьалзавайбуру къайдайрал амал тавунин нетижада гьар юкъуз чIуру агьвалатар арадал къвезва.
Къуншидин машин — кьарада
РД-дин МВД-дин пресс-къуллугъди хабар гузвайвал, Махачкъаладин Кирован райондин полициядин отделдиз Ленинкент поселокдин 30 йисан яшда авай агьали арза гваз атана. Адан гафаралди, кIвалин патав акъвазарнавай «ВАЗ-211132» машин йифен геж вахтунда са ни ятIани чуьнуьхна. Машин 110 агъзур манатдин къиметдик квайди я.
ГИБДД-дин ДПС-дин полкунин инспекторри 15 ва 17 йисарин яшара авай кьве жегьил тайинарна ва отделдиз хкана. Абур кьведни Ленинкент поселокдин агьалияр я.
Малум хьайивал, и гадайриз ксудалди вилик машин гьализ кIан хьана, амма абурукай садан бубадин машиндик худ акатнач. Ихьтин «нагьакьан» месэладал ацалтай жегьилри чпин рикIе акьур кар кьилиз акъудун патал маса фенд жагъурна: къуншидин машинда ацукьна, Семендер галай патахъ фена. Амма инани абур нагьакьан дуьшуьшдик акатна: кьарада акIай машин санихъни юзун хъувунач. Маса са чарани таххьай жегьилриз амукьайди машин гьанал тун ва кIвалериз кат хъувун тир. Пакамахъ абур полициядин къуллугъчийри отделдиз хкана ва суал-силис авуна. Машин сагьибдив вахканва.
«Лезги газет»
