Кьурагьрин сад лагьай нумрадин юкьван школа. Алатай кIелунин йисуз ада кьудкъад лагьай сеферда жегьилар-жаванар уьмуьрдин чIехи рекьиз шад гьалара рекье туна. Баркаллу кьудкъад йис. Эгер тарихдиз вил вегьейтIа, алатай асирдин пудкъад лагьай йисарин эвел кьилерай школа къизилдин ва гимишдин медалралди акьалтIарай жегьилри чи чIехи уьлкведин жуьреба-жуьре пипIера чпин чирвилер мадни вини дережадиз акъудна, илимдин чIехи кукIушриз хкаж хьана, Ватандин абадвал патал чпин вири къуватарни чирвилер мердвилелди серфна. Къе чи райондин зегьметчийри абурун тIварар еке гьуьрметдивди кьазва.
Къе чпин тIварар уьлкведин жуьреба-жуьре пипIера машгьур хьанвай, уьмуьр акьалтзавай несилдин бахтлу гележег патал бахшнавай муаллимрин баркаллу зегьметни кьетIендаказ къейд тавуна жедач. И жигьетдай чна сифте нубатда рагьметлу Гьалимат Жалаловнадин экуь къамат рикIел хкин. Алатай асирдин кьудкъад лагьай йисарин эвел кьиляй Дагъустандин пединститутдин математикадин факультет лап хъсандаказ акьалтIарай адаз гьа вичи кIелай институтда муаллим яз кIвалахун теклифнай. Амма ада вичин хайи школада зегьмет чIугун асул везифа яз гьисабна, хуьруьз хтана. Гьалимат Жалаловнади муаллим, директор, чирвилерин ва тербиядин рекьяй директордин заместитель яз вичин эхиримжи нефесдалди зегьмет чIугуна. Адан велед, дидедин рехъ давамарзавай Марина муаллимдин зегьметни кьетIендаказ къейд ийиз жеда. ЯхцIур йисав агакьна девирда Марина муаллимди хайи школада михьивилелди, къайгъударвилелди зегьмет чIугвазва. Образованидин рекьяй гьукумдарри адан зегьметдиз къиметни гана: ам «Просвещенидин гьуьрметлу работник» лагьай тIварцIиз лайихлу хьанва. Къе вичин хайи дидедин баркаллу пеше давамарзавай Марина муаллимдихъ мадни еке агалкьунар хьун чи мурад я.
Алатай асирдин кьудкъад лагьай йисарин эвел кьилерай Марина муаллимдихъ галаз санал багъри школадиз, Дагъустандин пединститутдин физикадинни математикадин факультет акьалтIарна хтай Фейзуллаева Гьуьруь муаллимдин чешнелу зегьметни за райондин «Дагъдин булах» газетда, тарифдин макъала кхьиналди, са шумуд йис идалай вилик къейднай. Шад жедай кар ам я хьи, 2-3 йис идалай вилик Гьуьруь муаллимни «Россиядин Федерациядин просвещенидин гьуьрметлу работник» лагьай тIварцIиз лайихлу хьана. Хизандай кьуд муаллим акъатун (Фазият муаллимдин экуь къаматдизни чна икрамзава) мегер бахтлувал тушни! Кьуд муаллимдини чпин вири уьмуьр акьалтзавай несилдин бахтлу гележег патал серфна, кьве муаллимди и кIвалах алай вахтундани давамарзава.
Са шумуд йис идалай вилик, гьеле Катибов Нурагьмед муаллимди чи Кьурагьрин сад лагьай нумрадин юкьван школада чирвилеринни тербиядин рекьяй директордин заместитель яз кIвалахзавайла, за адан зегьметни кьетIендаказ къейднай. Алай вахтунда Нурагьмед муаллимдин кьве веледди — Зинаидади Кьурагьрин сад лагьай нумрадин, Сабинади КIирийрин юкьван школайра муаллимар яз намуслувилелди зегьмет чIугвазва.
Чешнелу зегьметдай Зинаида муаллимни «Россиядин Федерациядин образованидин гьуьрметлу работник» лагьай тIварцIиз лайихлу хьанва.
Школадин баркаллу тIвар машгьур хьун аялри спортда къазанмишзавай агалкьунрилайни аслу тирди садазни сир туш. Саки яхцIур йисав агакьна девирда Исаев Герман муаллимди и школада зегьмет чIугвазва. Эхиримжи йисара саки гьар йисуз чи спортсменри районда, республикада кьиле физвай спортдин акъажунра кIвенкIвечи чкаяр кьун Герман муаллимдин зегьметдин нетижа я. Амни «Россиядин Федерациядин образованидин гьуьрметлу работник» лагьай тIварцIиз лайихлу хьана. Генани агалкьунар хьурай вичихъ.
Алатай кIелунин йисан эхирра и цIарарин автордин уьмуьрдани лишанлу вакъиа кьиле фена: «Россиядин Федерациядин просвещенидин гьуьрметлу работник» лагьай тIварцIиз лайихлу хьана. ГьакIни лезги чIал вилик тухунин ва адан сергьятар генани гегьеншарунин кардик еке пай кутазвай республикадин «Лезги газетдин» патай Гьуьрметдин грамотадиз, алатай йисан октябрдин вацра, 70 йис тамам хьунихъ галаз алакъалу яз, республикадин образованидин ва илимдин министерстводин, гьакI райондин администрациядин патай гьуьрметдин грамотайриз лайихлу хьана.
Винидихъ тIварар кьунвай муаллимриз баркаллу тIварар мубаракзава. Къуй гележегда абурухъ мадни еке агалкьунар хьурай.
Абдулла Семедов
