СтIал Сулейманан районда 30-дав агакьна библиотекаяр кардик ква. Кьилиндини аялрин библиотекаяр Кьасумхуьрел ала, амай 27 — хуьрера. Зизикрин хуьруьн библиотекадин заведующий Мегьамедова Гуьлше Алибеговнадихъ галаз чун и мукьвара гуьруьшмиш хьана, анин виликан ва къенин девиррикай, ктабрал рикI алайбурукай суьгьбетарна. Библиотекада ада 1982-йисан апрелдилай инихъ кIвалахзава. Г. Мегьамедовади Махачкъалада Дагъустандин культпросветучилищедин библиотекайрин отделение 1991-йисуз акьалтIарна.
И пеше къачуникай рахадайла, ада Артур Шопенгауэран «библиотека инсаниятдин зигьин хуьзвай ва терг тежер тек са чешме я» келимаяр тикрарна.
Библиотекада аквадай агитациядин такьатри чпел фикир желбзава. Ина ктабрин выставкаяр ачухнава, цларал «Край мой — капелька России», ЧIехи Гъалибвилин 80 йис тамам хьунихъ галаз алакъалу, «2025-год — год защитника Отечества» (ам Ватан хуьдайбурун йисаз, СВО-дин иштиракчияр тир зизиквийриз талукьарнава), «Земля — наш общий дом», «Экология и мы», «Мы против наркотиков», «Несилриз ирс тунвай шаир» (ам СтIал Сулейманаз талукьарнава), «Чал Эминан халкь лугьудай тIвар ала» ва маса стендар, плакатар ала. Ина «Библиотекарь» цлан газет акъудзава, «Кар алакьдай гъилер» пIипI кардик ква.
Гуьлше Мегьамедовади суьгьбет авурвал, библиотекада 4900-далай виниз ктабар ава. Абурун арада лезги литературадин классикрин, шаиррин, писателрин ктабри кьетIен чка кьазва. Библиотекадай ктабар къачуз, кIелзавай ксарин кьадар 400-дав агакьзава. Ктабар къачузвайбурун ва гзаф кIелзавайбурун арадай яз, заведующийди Арасханова Камиладин, Мегьамедова Алиядин, Селимова Наидадин, Эмирханов Абукаран, Амирханова Марьяман ва масабурун тIварар кьуна. Абуру библиотекада тухузвай мярекатра, районда библиотекайрин кIелзавайбурун арада тухузвай конкурсра активвилелди иштиракзава, кIвенкIвечи чкаяр кьазва.
Тежрибалу пешекар Г. Мегьамедовади библиотекада гьар жуьредин мярекатарни кьиле тухузва. ИкI, сентябрдин эвелра ина «Бесландин тIал — Россиядин тIал» лишандик кваз тухвай мярекатда библиотекадин кIелзавайбуру, школадин муаллимри ва аялри иштиракна.
ЧIехи Гъалибвилин 80 йисан юбилейдиз, Михаил Шолохован, Александр Пушкинан, Алибег Фатахован, СтIал Сулейманан яратмишунриз талукьарна тухвай мярекатарни хуьруьнвийриз гзаф бегенмиш хьана.
Гуьлше Мегьамедова гьамиша хуьруьнвийрин къайгъуйра ава. Мукьвара ам 100 йисан юбилей къейд авур Сулейманов Къурбанкъулидин патав кIвализ фена, адаз газетрай цIийи хабарар кIелна, агъсакъалдин гуьгьуьл къачуна.
СВО-дин иштиракчи Мирзамегьамедов Замудинал кьил чIугуна, ватанпересвиляй адаз чухсагъул лагьана.
Библиотекада къайдадик кваз эцигнавай столрал «Лезги газет», «Дагестанская правда», «Куьредин хабарар» газетар, «Самур», «Кард», «Дагъустандин дишегьли» журналар ала.
Г. Мегьамедовадин 43 йисан намуслу зегьмет РД-дин яратмишунрин кIвалин, СтIал Сулейманан райондин кьилин, райондин центральный библиотекайрин къурулушдин директордин патай гьуьрметдин грамотаяр гуналди къейднава. Тежрибалу пешекардиз хуьруьнвийрин арада лайихлу гьуьрмет ава.
Хазран Кьасумов
