Газетдин редакциядин почтадиз агьалийрилай къвезвай суалриз чун Россиядин Яша­йишдин фондунин­ (СФР) Да­гъустанда авай отделени­дин пресс-къуллугъдин куьмекдал­ди жавабар агакьариз алахъ­зава­. Редакциядиз алатай гьафтеда пуд арза атанвай. Абур рекье тунвай ксари чпин хизанра 3 йис тамам тахьанвай аялар аваз, чпиз дидевилин капиталдин такьатрай яз пул гун патал авур арза кьабул тавунвайдакай хабар ганвай ва месэладай кьил акъудун тIа­лабнавай.

РикIел хкин, къенин юкъуз дидевилин капиталдин такьатар 5 хиле харж ийиз жезва: яшайишдин шартIар хъсанаруниз, аялар патал чирвилер къачудай къуллугърай гудай пул яз, дидедин гележегдин пенсия патал, инвалид аялар обществода яшайишдин рекьяй адаптациядин ва интег­рациядин къуллугърай гудай пул яз, гьакIни пуд йис тамам тахьанвай аял авай хизанар патал гьар вацра гудай пул яз, эгер хизандин дуллух тIимилди ятIа (яни виридаз и пул гузвач).

Дагъустанда авай отделенидин Управляющийдин везифаяр тамамарзавай А.А. Загьидовадин къул алаз рекье тунвай жаваб чна агъадихъ гузва.

«Алай вахтунда Дагъустанда 4807 хизанди, дидевилин капиталдин такьатрин гьисабдай яз, гьар вацра пул къачузва. И жуьредин такьатар гун ва тагун санлай хизандин агьвалдилай, республикада яшамиш хьун патал тайинарнавай пулунин агъа кIанин кьадардилай (прожиточный минимум) аслу жезва. Дагъустанда къенин юкъуз ам 15 653 манат я. И пул гун талукь жезвай ксаривни ам и кьадарда аваз агакьзава.

Диде-буба гъавурда гьатдайвал, лугьуз кIанзава хьи, 3 йисал къведалди аял авай куь хизандиз и пул гун лазим яни, тушни квевайни чириз жеда. И кар ­патал ­хизанда дидедизни бубадиз ва абурун яшар тамам хьанвай аялриз эхиримжи 12 вацра атанвай вири пул, яни хизандин вири дуллух (мажиб, пособие, пенсия, ­стипендия ва мсб.) 12 чкадал ва хизандин кьадардиз (дидевилин капиталдин такьат­рай пул тайинарун фикирда авай аялни кваз) пайда. Эгер арадал атанвай ­кьадар пул республикада яшамиш хьун патал тайинарнавай пулунин агъа кIанин кьве кьадардилай (32 274 манат) тIимил яз хьайитIа, квевай и пул тайинариз жезва.

Къейд ийиз кIанзава хьи, эгер сертификатдин сагьибди и пул тайинарун патал 2025-йисан февралдиз арза ганватIа, ам тайи­нарун патал 2024-йисан январдилай декабрдалди къазанжи ахтармишда. Гьа са вахтунда цIай кьунин, яд акьалтунин ва мусибатдин маса бедбахтвилер арадал атунай са сеферда гайи пулар гьисаба кьазвач. Мадни и пул тайинардайла, эменнидин жигьетдай хизандин таъминвилизни килигзавач».

Чи мухбир