Муаллим. Чахъ гьар садахъ рикI алай муаллимар хьана. Гьавиляй и гафуни чи гьар садан рикIик ашкъи кутазва, чи гуьгьуьлар ачухарзава. Пешейрин кьадардин и кьил а кьил авач, амма муаллимвилин пеше виридалайни важиблуди я лагьайтIа, зун са кIусни ягъалмиш туш. ГьикI хьи, амай вири пешейрин сагьибар гьазурзавайбур, абуруз тербия гузвайбур муаллимар я эхир.
Муаллимди, тарсунихъ галаз сад хьиз, аялриз уьмуьрдин гьар са рекьяй тербияни гузва, гьавиляй абуруз кьвед лагьай диде-бубаярни лугьузва. Муаллимрилай чешне къачуналди, гележегда чпини гьабурун пеше хкяна, аялрикай чпикайни муаллимар хьайи дуьшуьшар тIимил авани мегер! Ахьтинбурукай сад СтIал Сулейманан райондин Вини СтIалрин хуьре яшамиш жезвай Наргиля Ферзилагьовна Жамиева я.
Гьеле гъвечIи классра кIелзавайла, муаллимвилин пеше рикIи чIугур Наргиля, хайи хуьруьн мектеб акьалтIарна, Махачкъалада ДГПУ-дин филологиядин факультетдиз гьахьна. 2007-йисуз анаг акьалтIарай ам хайи хуьруьн мектебда урус чIаланни литературадин тарсарин муаллим яз кIвалахдив эгечIна. Ада вичин везифаяр жавабдарвилелди, еке ашкъидивди, гьевеслудаказ кьилиз акъудзавай. Гьелбетда, Наргилядин кьатIунар, алакьунар райондин образованидин управленидин кьиле авай ксаризни малум тахьаа амукьнач. 2013-йисалай 2024-йисалди ада школада завучвилин везифаяр кьилиз акъудна. 2025-йисалай Н. Жамиевадал школадин директорвилин везифаяр ихтибарнава. Чи мурад адахъ жавабдар и къуллугъдални еке агалкьунар хьун я.
За Наргиля Ферзилагьовнадиз ва чи вири муаллимриз 5-октябрдиз къейд авур пешекарвилин сувар рикIин сидкьидай тебрикзава. Къуй абурухъ мягькем сагъламвал, кIвалахда агалкьунар ва хизанра хушбахтлувал хьурай!
Замир Мегьамедов,
«Куьредин хабарар» газетдин штатдик квачир мухбир
