Газетдин алатай нумрада «Халкьар гзаф — уьлкве сад» конкурсдин (ам алай йисан, 1-июлдиз башламишнай) нетижаяр кьурдакай кхьенай. Мадни а кардикай шадвилелди хабар гуз кIанзава хьи, Мискискарин М. Ахундован тIварунихъ галай юкьван школадин «Нур» коллективди конкурсда «Россиядин халкьарин милли гьаятар» номинацияда 3-чка кьуна.
Идакай чаз газет чапдиз вахкайдалай кьулухъ малум хьана. РикIел хкин, Дагъустандин милли сиясатдин ва динрин крарин рекьяй министерстводи тешкилнавай, Ватан хуьдайбурун йисаз ва ЧIехи Гъалибвилин 80 йис тамам хьуниз бахшнавай и конкурсдиз 180-далай виниз арзаяр рекье тунвай. Адаз «Сегьне», «Видеоролик», «Фольклордин эсер», «Россиядин халкьарин милли гьаятар» ва «Дагъустандин халкьарин чIаларал шиирар» номинацийрай къимет гана.
Дугъриданни, Махачкъалада, конкурсдин нетижаяр кьуниз талукьарнавай мярекат кьиле фейи Къумукьрин А. Салаватован тIварунихъ галай госмуздрамтеатрдин фойеда туькIуьрай Дагъларин уьлкведин жуьреба-жуьре районрин, хуьрерин «милли гьаятар» вири фикир желбдайбур тир. Абуруз рикI гваз гьазурвал акунвайди виле акьазвай. ГьикI хьи, жуьреба-жуьре миллетрин милли хуьрекар, ширинлухар, яр-емиш алаз суфраяр темягь фидайвал безетмишнавай. Гьар са «гьаятда» гъилин милли сеняткарвилин устадри чпин алакьунар къалурзавай. Гьелбетда, «Нур» коллективдин милли гьаятни тарифдиз лайихлуди тир.
Къейд авун лазим я хьи, конкурсдиз гьазурвал акун, ана иштиракун патал Мискискарин юкьван школадин директор Амира Эмирагъаевади ва бажарагълу къуллугъчияр тир Зейнаб Магьарамовади, Тименагъа Рамазановади, Фейзе Сефимирзоевади ва Сабина Абасовади зегьмет чIугуна. Мубаракрай, гележегда мадни еке агалкьунар хьурай!
Рагнеда Рамалданова
