Наркотикар дуьздал акъудна
26-сентябрдиз, Дербент шегьердин 50 йисан яшда авай чкадин агьалидин кIвал ахтармишдайла, Дагъустандин МВД-дин къуллугъчийри набататдин жуьредин гзаф кьадарда наркотик дуьздал акъудна ва вахчуна. Идакай чаз МВД-дин пресс-къуллугъди хабар гана.
Экспертизади тайинарайвал, полицейскийри дуьздал акъудай шей марихуана яз хьана. Адан заланвал саки 900 грамм тир. Шак физвайда полицейскийриз хиве кьурвал, набатат ада вичи ишлемишун патал хсуси участокда цана.
РФ-дин УПК-дин 91-статьяда къалурнавай къанундал амал авуналди, шак физвайди полицейскийри кьуна. Тахсиркарвилин лишанриз килигна, РФ-дин УК-дин 228-статьядин 2-паюнай уголовный дело къарагъарнава.
Шак физвайди кьуна
Мукьвара Хасавюртда полициядин къуллугъчийризни, «Мак-2025» серенжемдин сергьятра аваз, 42 йисан яшда авай чкадин агьалидин кIвал ахтармишунин нетижада са утагъдай набататдин жуьредин наркотикар жагъана.
Экспертизади тайинарайвал, вахчурди марихуана тирди тестикь хьана. Адаз 11973 граммдин заланвал авай. Шак физвайди полицейскийри кьунва. Агьалиди хиве кьурвал, гзаф кьадарда наркотикрин партия ада Москвадай кьабулна. Адаз марихуана Дагъустанда маса гудай къаст авай.
Тахсиркарвилин лишанриз килигна, РФ-дин УК-дин 30-статьядин 3-паюнай ва 228-статьядин 4-паюнай уголовный дело къарагъарнава.
«Лезги газет»
