26-28-сентябрдиз Докъузпара райондин Къурушдал спортдин кьетIен мярекат (марафон) — адан иштиракчияр патал бедендин лигимвални къуватар ахтармишдай имтигьан ва райондин спортдин уьмуьрда лишанлу вакъиа кьиле фена. Марафондин тешкилатчи Къурушдал кардик квай ял ядай «2560» базадин сагьиб Даир Керогълиев тир.
Адан чалишмишвилерин, спортдихъ авай еке гьевесдин нетижа яз, акъажунар вини дережада аваз кьиле фена, иштиракчийризни тамашачийриз яргъалди рикIел аламукьдай легьзеяр багъишна. Спортдин серенжемдиз спонсорвал авурбурун арада мадни «5 дагъ», «Чи лекь» ял ядай базаяр, «Иерди» туьквен авай. Абуру гьам марафондин иштиракчийриз, гьамни адан тамашачийриз къулай шартIар тешкилдай, гъалибчияр хъсан пишкешралди къейддай мумкинвал гана.
Докъузпара райондин муниципалитетдин кьил М. Шамилован тапшуругъдалди марафондиз талукь шад мярекатда иштиракай администрациядин аппаратдин регьбер Ремихан Саруханова (ана райондин кьилин советник Абдул Арабовани иштиракна) иштиракчийрихъ агалкьунар хьун алхишна, районда спорт ва активнидаказ ял ягъун вилик тухунай турнирдин спонсорриз сагърай лагьана. Ихьтин серенжемри сагъламвал, инсанрин арада садвал мягькемариз, спортда руьгь хкажиз куьмекзавайди къейдна.
Марафонда Дагъустандин жуьреба-жуьре пипIерай тир 41 жегьилди иштиракна. Абуру альпинизмдин жуьрейрикай сад тир скайрайнингдай — дагъдин кьакьан кукIушриз — 5 км мензилдиз хкаж хьунай чпин алакьунар къалурна. Виридалайни вилик аниз хкаж хьайи, кIвенкIвечи чкаяр кьур пуд касни къурушвияр я. ИкI, Нариман Жалилова 51 декьикьада и мензил атIана, 1-чка кьуна. Адаз диплом, грамота, гьакI «2560» базада 3 юкъуз, вири мумкинвилерикай менфят къачуна («всё включено»), ял ядай ва «Иерди» туьквендай кIвачин къапар ва аксессуарар маса къачун патал 10 агъзур манатдин сертификатар, 15 агъзур манат гана. Талукь дережадин дипломдиз, грамотадиз 2-чка кьур Мегьамед Велибегов (адаз 2 юкъуз ял ядай ва туьквендин патай 7 агъзур манатдин сертификатар, 10 агъзур манат гана) ва 3-чка кьур Вагьид Кишиевни (адаз са юкъуз ял ядай ва туьквендин патай 5 агъзур манатдин сертификатар, 5 агъзур манат гана) лайихлу хьана.
Марафондин тешкилатчийри аялар патал лотерея къугъвана (ана кьилин пишкеш телефон тир), виридаз аш, шурва, чай гана, аялриз — ширинлухарни.
Рагнеда Рамалданова
