И йикъара Махачкъалада, Къумукьрин А. Салаватован тIварунихъ галай госмуздрамтеатрда, республикадин «Халкьар гзаф — уьлкве сад» конкурсдин нетижаяр кьуниз талукьарнавай мярекат кьиле фена. Ана, чи районрайни шегьеррай хьиз, къецепатай атанвай иштиракчийрини мугьманри иштиракна. Мярекат РД-дин милли сиясатдин ва динрин крарин рекьяй министрдин везифаяр вахтуналди тамамарзавай Темирлан Абуталимова ачухна. Гьуьрметлу мугьманрин арада Дагъустандин Кьилин советник Энрик Муслимов, РД-дин Халкьдин Собранидин Комитетдин председатель Елена Павлюченко ва гзаф масабур авай.
Театрдин фойеда мугьманриз милли гьаятриз килигдай, Дагъустандин халкьарин манийрихъ яб акалдай ва кьуьлериз тамашдай мумкинвални авай. Мярекат ачухай Темирлан Абуталимова ва анал рахай амайбуруни са шумуд миллетдин ва диндин векилар яшамиш жезвай кьетIен макан тир чи регион патал ихьтин конкурсрихъ авай важиблувал, абур халис суварриз элкъвезвайди, абурун гьар са иштиракчиди жуван халкьдин адетар ва культура хуьник лайихлу пай кутазвайди, чун жуьреба-жуьре халкьар ва саналди са хизан тирди къейдна.
РикIел хкин хьи, Дагъустандин милли сиясатдин ва динрин крарин рекьяй министерстводи тешкилна, алай йисан 1-июлдиз башламишай и конкурс Ватан хуьдайбурун йисаз ва ЧIехи Гъалибвилин 80 йис тамам хьуниз бахшнава. Ана иштиракун патал 180-далай виниз арзаяр ганвай (ам 5 номинацияда кьиле фена). Гъалиб хьайибурув и мярекатдал дипломар ва пишкешар вахкана.
«Лезги газет»
