И мукьвара Кьурагь райондин Гелхенрин хуьре, СССР-дин спортдин мастер Неби Камалдинован экуь къаматдиз бахшна, волейболдай 4-турнир кьиле тухвана. Гьар йисуз тухун адетдиз элкъвенвай и серенжемдин макьсад спортсменрин устадвал хкажун, санлай спорт вилик тухуниз ва сагълам уьмуьр кечирмишуниз эвер гун, дуствилин алакъаяр мягькемарун тир.

Къизгъиндаказ кьиле фейи къугъун­рин нетижада финалда «Гелхен» ва «Шимихуьр» командайрин къугъун — 2:0, «Кьурагь» ва «Кукваз» командайрин арада­ 3-чка патал къугъун 2:1 гьисабралди акьалтIна.

Гъалиб хьайи командайрив шабагьар вахкудай шад мярекатдал Кьурагь райондин кьил З. Азизован тIварунихъай акъа­жунрин спонсор Керим Камалдиноваз райондин спорт ва физический культура вилик тухунай сагърай лагьанвай чар кIелна. Керим Мегьамедовича турнирдин иштиракчийрихъ мягькем сагъвал, спортдани агалкьунар хьун алхишна.

Турнирда иштиракай вири командаяр медалар, грамотаяр ва пишкешар гуналди къейдна. Виридалай­ни хъсандиз къугъвайбур яз ­гьи­сабай Г. Азизоваз (Кукваз), Н. Мирзоеваз (Кьурагь), С. Насруллаеваз (Ши­михуьр), Гь. Мамедоваз (Гел­хен) пулдин пишкешар гана. Спортсменри ва тама­шачийри турнирдин тешкилатчийриз, спонсордиз, Гелхенрин СОШ-дин кьиле авай ксариз ам хъсандиз тешкилунай, акъажунрин вахтунда чай, тIуьн гьазурна гунай сагърай лагьана.

Рагнеда  Рамалданова