И йикъара Россиядин ФСИН-дин (Федеральная служба исполнения наказаний) Дагъустанда авай Управленидин начальник, къенепатан къуллугъдин полковник Сергей Ролдугина республикадин агьалийрихъ галаз нубатдин сеферда гуьруьш (личный приём) кьиле тухвана. Серенжемдин макьсад УФСИН-дин кIвалахдин михьивал къалурун, жемиятдихъ галаз авай алакъа хъсанарун, агьалийрик къалабулух кутазвай месэлаяр тади гьалда гьялун тир.
УФСИН-дин кьиле авай ксари и серенжемдихъ еке важиблувал аваз гьисабзава, гьикI хьи, идарадин кIвалахдиз ийизвай ихтибарлувал хкажиз ва къуллугъдин гьакъикъатдин шикил арадал гъиз куьмекзава. Гьаниз килигна, абур гележегдани тухун пландик ква.
— Агьалияр кьабулун абурухъ галаз алакъа хуьнин важиблу серенжем я. Ада чаз агьалийрихъ гьихьтин месэлаяр аватIа чирдай, гьуьжет алайбурун гъавурда твадай ва кьилиндини, УФСИН-дихъ авай мумкинвилерин сергьятра аваз, лазим куьмек агакьардай мумкинвал гузва. Гьар са касдин арза за жуван гуьзчивилик кутада, абуруз килигунин нетижа яз, гьар садав жаваб агакьарда, — къейдна УФСИН-дин начальникди.
Адахъ галаз гуьруьшмиш хьайибурун арада управленидик акатзавай идарайрин къуллугъчияр, УИС-дин (уголовно-исполнительный система) пенсионерар, дустагъра авай ксарин мукьва-кьилияр ва дустагъра авайбурун шартIариз итижзавайбур авай. Кьилди къачуртIа, суалрин чIехи пай региондин УИС-да кIвалахал акъвазуниз, пенсийриз, мажибдиз, къуллугъчияр кIвалералди таъминаруниз ва абуруз авай заминвилериз, дустагънавай ксар авай шартIариз ва медицинадин рекьяй куьмекдиз талукьбур тир. Гьар са касдихъ дикъетдивди яб акалайдалай кьулухъ УФСИН-дин регьберди, къуватда авай законрин нормайрал асаслу яз, абурун суалриз жавабар гана. Са шумуд суалдиз талукь яз управленидин жавабдар къуллугъчийриз алава ахтармишунар кьиле тухунин ва лазим серенжемар кьабулунин тапшуругъар гана.
Чи мухбир
