Алатай гьафтеда РД-дин государстводин закупкайрин рекьяй Комитетдин председателдин везифаяр вахтуналди тамамарзавай Жафар Гьажибегова Сулейман-Стальский райондин агьалийрин арзайрихъ яб акална. Муниципалитетадин администрацияда кьиле фейи мярекатда райондин кьил Нариман Абдулмуталибова, администрациядин жавабдар къуллугъчийрини иштиракна.
Рекьер ремонт авуниз, электрикдин симер дегишаруниз, Кьасумхуьрел спорткомплекс эцигуниз, цIийи трансформаторар кардик кутуниз, газдалди таъминаруниз талукь ва са жерге маса месэлаяр гваз Жафар Гьажибегован патав Курхуьруьн администрациядин кьил Радик Гьажалиев, Испикрин администрациядин кьил Руслан Магьмудов, райондин собранидин депутатар Мегьамед Алиевни Агьмедбег Селимов, тренер Альберт Межидов, Алкьвадар, Асалдхуьр, Кьасумхуьр, Агъа СтIал-Къазмаяр, ЦIийи Мамрач хуьрерин агьалияр атанвай.
Мегьамед Алиева хабар гайивал, Кьасумхуьрел, республикадин инвестицийрин программадин сергьятра аваз хкажзавай спорткомплексдин эцигунар, пулдин такьатар авач лугьуз, 2013-йисалай инихъ акъваз хьанва. Ада гьакIни райондин бязи мектебар аварийный гьалда авайди, ясли — бахчайра чкаяр бес тежезвайдини къейдна.
ЦIийи Мамрач хуьруьн агьали Закарья Жамалдинова хуьр тамамдиз электричестводалди, газдалди таъминарунин, рекьер къайдадик кутунин игьтияж авайдакай лагьана.
Нариман Абдулмуталибова республикадин метлеб авай «Мамрач-Ташкапур» рехъ капитальный ремонт авунин месэла гьялунин карда Жафар Гьажибеговавай куьмек тIалабна.
РД-дин государстводин закупкайрин рекьяй Комитетдин председателдин везифаяр вахтуналди тамамарзавайда веревирд авур вири месэлаяр гьялун хсуси гуьзчивилик кутадайди, абурукай Дагъустандин руководстводизни хабар гудайди къейдна.
Нариман Абдулмуталибова райондин агьалийрин, яшайишдинни экономикадин ва маса месэлаяр гьялуник къуьн кутунай Жафар Гьажибеговаз сагърай лагьана.
Агьмед Магьмудов
