27-августдиз Мегьарамдхуьруьн райондин администрацияда “Самурский” заказникдин мулкунал гидрогеологиядин жигьетдай арадал атанвай гьалариз алава яз къимет гунин барадай Россиядин Федерациядин Президент Владимир Путинан тапшуругъ кьилиз акъудун чарасуз тирвилихъ галаз алакъалу яз Дагъустан Республикадин Гьукуматдин Председатель Артем Здунован ганвай тапшуругъ тамамаруниз талукь месэладай совещание хьана. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана.
Совещанидал гъанвай месэла гьялунин карда райондин администрациядин аппаратдин къуллугъчийри, федеральный исполнительный властдин чкайрал алай органрин ва общественный тешкилатрин векилри иштиракна.
Гуьруьш ачухай райондин кьил Фарид Агьмедова Россиядин Федерациядин Президентдин ва Дагъустан Республикадин Гьукуматдин Председателдин тапшуругъар энгел тавуна кьилиз акъудун ва къанун-къайдадин сергьятра аваз райондин мулкунал властдин вири хилери чпин гьерекатар алакъалу авун чарасуз тирди къейдна.
Лугьун лазим я хьи, и месэла совещание жедалди вилик РД-дин Гьукуматдин Председатель Артем Здунова Мегьарамдхуьруьн райондин векилрихъ галаз санал веревирд авурди я.
Винидихъ тIвар кьунвай месэладай гуьруьш кьиле фидай чIавуз Артем Здунова ахтармишун патал са шумуд къуй эгъуьнунин, гидрологиядин гьалар ахтармишунин ва чилин кIаник квай ятарин дережа гьи тегьерда дегиш жезватIа, гьа кардиз дуьзгуьн къимет гунин теклиф раижна.
Артем Здунова республикадин Гьукумат Самурдин тамун экология патал гьихьтин нетижаяр арадал атун мумкин ятIа чирдайвал са шумуд къуй эгъуьнунин кIвалахар гъиле кьаз гьазур тирдан гьакъиндай малумарна.
Россиядин МВД-дин Мегьарамдхуьруьн районда авай отделдин начальник Мегьамедагъа Эминова, райондин общественный палатадин председатель Агъадаш Нагъметуллаева ва кIватI хьанвай маса ксари гьялзавай месэла гзаф важиблуди тирди, кьилдин ксарин ва дестейрин футфачивилин гьерекатрин вилик пад кьунин мурадралди агьалийрин арада гъавурдик кутунин кIвалах гужлу авун чарасуз тирди къейдна.
«Лезги газет»
