Дагъустан Республикадин Кьил Сергей Меликова 30-сентябрдиз респуб­ликадин призывдин комиссиядин ва оперативный штабдин саналди тир заседание кьиле тухвана. Анал гьялай кьилин месэла 1-октябрдилай эгечIзавай зулун призывдиз гьазур хьунихъ галаз алакъалуди тир.

«Уьлкведин Верховный Главнокомандующийди жегьилриз зулуз военный­ къуллугъ авуниз эвер гуниз талукь Указдал къул чIугунва. Чунни и месэладив эгечIзава. Июлдин вацра гатфарин призывдин кампаниядин нетижаяр кьадайла, военный къуллугъдал эвер гузвай призыв тешкилдайла, за ара атIунар хьун лазим туширдал фикир желбнай. Гатфаринни зулун кампанийрин арада­ авай вахт чна призывдин яшда авайбур­ яшамиш жезвай чкаяр чируниз ва учетдин столрин, призывдин комиссийрин­ кIвалах менфятлуди авуниз серфна­ кIан­да. Гьина йисан вири вахтунда и мес­эладив жавабдарвал хиве аваз эгечI­за­ватIа, гьана кIвалахар хъсандиз кьилени физва», — лагьана Сергей Меликова.

Зулун призывдиз военный комиссариатар гьазур хьанвай гьалдикай респуб­ликадин военный комиссардин везифаяр вахтуналди тамамарзавай Замирбег Курабегова малумат гана.

1-октябрдилай 31-декабрдалди да­гъустанвийриз Россиядин Яракьлу Къуватра къуллугъ авун патал эвер гуда. Абуру сергьятар хуьдай, гьакI маса кьушунрани, частарани къуллугъда. Сифтегьан дестеяр армиядин жергейриз 15-октябр­диз рекье твада. Замирбег Курабегован гафаралди, алай вахтунда гьазурлухвилин серенжемар саки куьтягьзава. Чкайрал герек шейэр хкизва, агьалияр зулун призывдив эгечIнавайдакай хабардар­зава.

Зулун призывдин кар алай кьетIенвал ам я хьи, государстводин информациядин ЕРВУ-дин (единный реестр воинского учета) къурулушдикай менфят къачуда. Адан сергьятра аваз, армиядин жергейриз эверзавайбуруз госуслугайрин порталдай электронный повесткаяр ракъурда. Республикадин военный комиссариат ва кIватI жедай пунктар призывдин серенжемар кьиле тухуз гьазур я. Гьа са вахтунда ДОСААФ патални лазим пешекарар гьазурунин планар ацIурзава.

З. Курабегова къейд авурвал, призывдин кIвалахдиз кьецI гузвай дибдин месэла регистрация авунвай агьалияр маса чкайра яшамиш хьунихъ галаз алакъалу я. ИкI тирвиляй абурув повесткаярни агакьариз жезвач.

Дагъустандин регьберди призывдин комиссийрин председателрал  военкоматрихъ галаз санал муниципальный вири тешкилатрин военный учетдин столрин векилрихъ галаз призывдин яшда авай агьалияр учетда тунин ва регистрация авунин месэлайриз талукь методикадин тарсар тухун тапшурмишна.

РД-дин Хатасузвилин Советдин секре­тардин заместитель Дайтбег Мустафа­ева муниципальный тешкилатар зулун призывдиз гьазур хьанвай гьалдикай малумат гана ва кIвалахда гьалтзавай кимивилер арадай акъуддай рекьерни къалурна.

Республикадин Кьили агьалийрихъ галаз  таблигъатдин кIвалах гегьеншарун теклифна. Идахъ галаз сад хьиз Сергей Меликова государстводин важиб­лу и ­месэладив жавабдарвилелди эгечIзавай хейлин районрин, гьа гьисабдай яз Къарабудахкент, Акуша районрин, Махачкъала шегьердин администрацийрин кьи­лериз сагърай лагьана.

— И важиблу кIвалах акъвазарунни герек туш. Зун умудлу я хьи, гьукуматди вилик эцигзавай везифаяр чна вахтунда кьилиз акъудда, — лагьана эхирдай Сергей Меликова.

*  *  *

Гьа и юкъуз Дагъустандин регьберди гьукумдин органрин кьилерихъ галаз октябрдин вацра вилик акъвазнавай везифайриз талукь совещание кьиле тухвана.

Октябрдин варз Дагълух районрин фо­рум кьиле тухунилай башламишнава. Пуд юкъуз кьиле фидай и мярекатда региондин Кьилини иштиракда. Форумдин иштиракчияр сад-садахъ галаз гуьруьш­миш жеда, абуру икьрарар кутIунда, выс­тавкайрилай-ярмаркайрилай вил ала­дар­да, заседанийра ва маса мярекат­ра иш­тиракда. Республикадиз форумда­ иштиракзавай мугьманар къвезва. Абурун арада федеральный министерствойрин, ведомствойрин кьилерни ава. Форумдин сергьятра аваз, федеральный органрин векилрихъ галаз Сергей Меликова госпитални ачухда. И юкъуз СВО-дин набутар хьанвай ветеранриз автомобиларни багъишда.

Республикади яшайишдин програм­­майра активнидаказ иштиракзава­. Ре­ги­ондин Кьили жегьил хизанрив ва чкIиз­вай гьалда авай кIвалерай куьч хьанвайбурув яшайишдин кIвалерин куьлегар вахкуда.

Октябрдиз А. Тахо-Годидин тIвару­нихъ галай милли музейдин 100 йисан юбилей къейдда.

Гегьеншдиз РД-дин Кьилин сайтдай кIелиз жеда.

Хийир Эмиров