Дагъустандин Кьил Сергей Меликован Указдалди, Мегьарамдхуьруьн райондин кьилин везифаяр тамамарзавайди яз вахтуналди Нариман Ражидинович Эфендиев тайинарнава. Идакай «Лезги газетдиз» РД-дин Кьилин Администрациядин пресс-къуллугъди хабар гана.
Къейд ийин хьи, райондин виликан кьил Фарид Агьмедов вич алай къуллугъдилай гуьгьуьллудаказ, арза кхьена, элячIна. Ада муниципалитетдиз 15 йисуз (2010-йисалай) регьбервал гана.
Нариман Эфендиеван чIехи бубайрин бинеяр Куьгьне Гъепцегьай я. Са девирда чIехи буба Эфенди Мегьарамдхуьруьз куьч хьанай ва ада 3 хуьруьн кавхавал авунай. Н. Эфендиев 1988-йисан 11-февралдиз виликдай РД-дин МВД-дин экономикадин хатасузвилин ва ришветбазвилиз аксивалдай управленидин регьбер яз кIвалахай Ражидин Эфендиеван хизанда дидедиз хьана. Алай вахтунда ада вахтуналди РД-дин Кьилин ва Гьукуматдин Администрациядин ришветбазвилиз аксивалдай управленидин кьилин везифаяр тамамарзава.
Нариман Эфендиева ДГУ-да кIелна, юристдин пеше къачуна. Россиядин Яракьлу Къуватрин жергейра къуллугъна. Армиядилай гуьгъуьниз республикадин налогрин органра, МВД-дин къурулушда кIвалахна. Эхиримжи йисара ада «Газпром Межрегионгаз Махачкала» ООО-дин генеральный директордин заместителдин къуллугъ кьиле тухузвай.
Республикадин бязи СМИ-рин делилралди, Фарид Агьмедов сентябрдин вацра кьиле фейи сечкийрин вахтунда Мегьарамдхуьруьн райондин депутатрин собранидин депутатвиле хкянава.
29-сентябрдиз Мегьарамдхуьре Нариман Эфендиев муниципалитетдин администрациядин активдихъ галаз танишаруниз талукьарнавай мярекат кьиле фена. Анал цIийи кьили къейд авурвал, райондиз регьбервал гун чIехи жавабдарвал я. Ада вичи ачухдаказ ва жавабдарвилелди кIвалахдайди лагьана, гьикI лагьайтIа, анжах гьа и дуьшуьшда хъсан нетижаяр къазанмишиз алакьда.
Агьмед Магьмудов
