Дагъустанда Советрин власть гъалиб хьайи йисара халкьдиз чирвилер гунин гегьенш кIвалахар тухвайбурукай сад Алкьвадар Абдулкъадир я. Ада медресада, гуьгъуьнлай Гуржистандин Гори шегьерда муаллимрин семинарияда кIелна.
Советрин девирда ада эвелимжи лезги букварь ва чIехибуруз кIелиз-кхьиз чирдай учебник, Дагъустандин школаяр патал эвелдай туьрк, ахпа урус чIаларин учебникар туькIуьрна. Республикадин меркезда (адал гьеле «Махачкъала» тIвар акьалтдалди) Алкьвадар Абдулкъадиракай Урус-мусурман сифтегьан училищедин сад лагьай заведующий, Дагъустандин просвещенидин работникрин центральный кIвалин (гуьгъуьнлай муаллимрин тежриба хкаждай институт) сад лагьай директор яз кIвалахна, яргъал йисара Ахцегьа, Кьасумхуьрел школайра, Дербентдин педучилищеда тарсар гана.
Алкьвадар Абдулкъадир аялар патал кхьенвай бажарагълу художественный эсеррин авторни я. Адан «Дурна», «Мастан», «Гатуз», «Къуьл», «Къацу чIурал» ва маса шиирар 30-40-йисара лезги чIалан учебникра, лезги поэзиядин антологияда (1958-йисан) ва «Сад, кьвед, пуд» кIватIалда (1961-йис) гьатнава.
«Лезги газетдин» 2025-йисан 36-нумрадай
