9-сентябрдиз Дагъустанда Москвадин футболдин «Динамо» школадин филиал ачухуниз талукьарнавай шад мярекат кьиле фена. Ана Дагъустандин Кьил Сергей Меликовани иштиракна. Идакай чаз РД-дин Кьилин ва Гьукуматдин Администрациядин пресс-къуллугъди хабар гана.
ЦIийи школа Каспийскда «Анжи-Арена» стадиондин патав гва. Ана вири къулайвилер арадал гъанва: алай аямдин къурулуш, лазим тадаракар, тренировкайрин программаяр. Тежрибалу пешекаррин гъилик 5-16 йисара авай жаванриз футболдин сирер чирда.
Школа ачухдалди вилик жаван футболистар хкягъун патал килигунар тешкилнавай. Сифтегьан дестеяр арадал гъанва, абур тарсарив эгечIнава.
Сергей Меликова цIийи школа ачухуниз талукь мярекатдал акьалтзавай несилдихъ еке агалкьунар хьун, «лацу — экуь вили» рангунин форма алайбурун баркаллу тарих лайихлудаказ давамардай ксар хкатун, школа футболдай бажарагълубур майдандиз акъуддай макандиз, чатуниз элкъуьн алхишна.
— Чи везифа аялар футболдин тарсарал желб авуникай ибарат я. ЦIийи школади акьалтзавай несилдин рикIе гуьрчег и къугъунив чка кьаз тада. Ана кIелзавайбуру гележегда чпин уьмуьр пешекарвилин футболдихъ галаз алакъалу авун яз, абур Лев Яшинан тIварунихъ галай ва Махачкъаладин «Динамодин» академийриз гьахьун патал гьазурда. Чун жаванриз алай аямдин вири шартIар тешкилиз алахъда, — лагьана С. Меликова.
Дагъустандин Кьили республикада эхиримжи пуд йисуз мини-футболдин — 85 ва футболдин чIехи 5 майдан туькIуьрнавайди рикIел хкана. Йисан эхирдалди чIехи 4 майдан мадни ишлемишиз вахкуда.
Кьилди футболдикай рахун яз, ада Къарабудахкент райондин Зеленоморск хуьре Россиядин футболдин союздин региондин центр арадал гъун патал эцигунрив эгечIнавайди, Красноармейск посёлокда футболдай школа-интернат эцигун, Каспийск, Хасавюрт, Избербаш, Дагъустандин Огни шегьерра стадионар цIийи хъувунин чIехи кIвалахарни кьилиз акъудун планрик квайди къейдна.
Вири и шартIар тешкилунин кьилин макьсад аялар футболдал къугъунал желб авун я. С. Меликова Россиядин футболдин союзди, «Динамо» обществоди, Москвадин «Динамо» клубди уьлкведа аялринни жаванрин футбол вилик тухун патал еке кIвалах кьиле тухузвайдакайни лагьана. Уьлкведин саки вири регионра 150-далай виниз школаяр ачухуни и кардин патахъай шагьидвалзава.
Футболдин «Динамо» школадин директор Алиби Асанова гьам санлай спортдиз, гьамни кьилди футбол къачуртIани, Дагъустанда хьиз куьмек гузвай маса регион вичиз акунач лагьана. Адан гафаралди, футболдин школадин кьилин макьсад чIехи футбол патал аялар хъсандиз ери аваз гьазурун я.
— Зун шад я Дагъустанда спортдин гуьрчег и къугъунал машгъул жез кIанзавай аялрин вилер акунал. Чи макьсад турнирра гъалибвилер, кубокар ва медалар къазанмишун туш. Кьилинди, школада хъсандиз гьазуруналди, аялриз Лев Яшинан тIварунихъ галай академиядиз гьахьдай мумкинвал гун я. Дагъустанда спортдиз еке куьмекар гузва. Сагърай Сергей Алимович Меликов! Са уьмуьр — са команда, — лагьана А. Асанова.
«Динамодин» академиядин футболдин школаяр вилик тухунин отделдин начальник Валерий Касалицади къейд авурвал, «Динамодин» методикадай уьлкведа, санлай къачурла, 9 агъзурдалай виниз аялар машгъул жезва. Школа неинки футбол къугъваз чирдай чка, гьакI беденни руьгь лигимарзавай чадни я. Мукьвал тир гележегда ада школада, академияда футболдин сирерай кьил акъудна, кьилин командадиз атанвай Дагъустандин футболдин гъетер акунихъ умудлувал къалурна.
РикIел хкин: Москвадин «Динамо» клубдин школа Махачкъаладин 5-нумрадин лицейдин базадални ачухнава. Клубдин планрик адан филиалар республикадин маса шегьеррани ачухун ква.
Рагнеда Рамалданова
