Россиядин Яшайишдин фондунин (СФР) Дагъустанда авай отделенидин пресс-къуллугъди хабар гузвай­вал, республикада страховкадин взносар гузвай са жерге работодателриз талукь яз законда алай йисан сентябрдилай кьезилвал гьатнава. ИкI, цIийи хъувунвай къайдайралди гила страхователри, яни взносар гузвай ксари, Дагъустандин Яшайишдин фондуниз чпикай малумат гунин мажбурвал амукьдач. ГьикI хьи, гила и идарадин пешекарри коллективриз (юрлица) ва карчийриз­ талукь госреестрдай (ЕГРЮЛ ва ЕГРИП) чпи и малумат къачуда.

РикIел хкин хьи, виликдай авай къай­дадалди, страхователри чпин кIва­лахдин асул дибдай тир жуьре тестикьарна кIанзавай. ГьикI хьи, ам, страхо­вателди работникар кIвалахдин вахтунда тIарвиликай, хасаратвилерикай­ ва пешекарвилихъ галаз алакъалу азар­­рикай страховка авуниз талукь яз взносрин кьадар (тариф) тайинардайла, лазим къвезвай. Гьаниз килигна, сентябрдалди кардик квай закондин къайдади Дагъустандин кIвалахдин кол­лективривай ва кьилдин ксаривай Яшайишдин фондунин региондин­ отделенидиз чпи кьиле тухузвай кIва­лахдин асул дибдай тир жуьре тес­тикьарзавай документар, делилар агакьарун ­истемишзавай. Абурун бинедаллаз, яни страховатзавайбуру кьилиз акъудзавай­ кIвалахдин хаталувилин дережа (риск) гьисаба кьуна, взносрин кьадар тайи­нарзавай. Асул гьисабдай яз кьилиз­ акъудзавай кIвалахдин хаталувал  гьи­кьван чIехиди хьайитIа, взносдин кьадарни гьакьван чIехиди жезва. Гила и кар Яшайишдин фондунин пешекаррин хиве тунва, яни, винидихъ лагьанвайвал, лазим делилар чпи къачуда.

Гьа са вахтунда цIийи къайда виридаз талукь жезвач. Иник, кьилди къа­чуртIа, чпин кIвалах страховкайрихъ галаз алакъалу коллективар (самостоятельные страхователи) акатзава. Абур патал къайда виликанди яз амукьда, яни абуру чпин асул гьисабдай тир кIвалахдин жуьре тестикьарзавай лазим делилар, документар Яшайишдин фондунин Дагъустандин отделенидиз рекье тун давамарда.

РикIел хкин хьи, Да­гъус­тан­дин работодателри, производст­вода бедбахт­вилин дуьшуьшрикай ва пешекарви­лин азаррикай кIвалахзавай ксар страховатун яз, гьар вацра яша­йишдин мажбури тир взносар гузва. Абурун кьадар лагьайтIа, чна винидихъни къейднавайвал, страховой тарифдихъ галаз­ ала­къа­лу яз тестикьарзава, амни кIва­лахда авай хаталувилелай аслу жезва.

Рагнеда Рамалданова