8-сентябрдиз Дагъустан Республикадин Гьукуматдин Председатель Абдулмуслим Абдулмуслимова Расул Гьамзатован международный «Лацу дурнайрин йикъар» фестиваль ачухна. Ам 10-сентябрдиз акьалтIна.
А. Абдулмуслимова къейд авурвал, гьар йисуз мугьманрал рикI алай Дагъустандин чилел чи агьалийри халкьдин шаир Расул Гьамзатован дустар ва шаирар, писателар кьабулзава. Чи шаир лап хъсандиз чизвай литературадин, культурадин деятелри и пак йикъаз гьуьрметиз гзаф йисар я.
— Им шииратдин чIехи сувар я. Лугьун хьи, ам са Расул Гьамзатованди туш. И майдандал Россиядин гзаф миллетрикай ибарат тир литература гегьеншарзава. Регионрин писателриз, шаирриз куьмек гузва. Уьлкведин эдебиятдин къурулушрин арада пешекарвилин алакъаяр мягькемарзава. Расул Гьамзатован шииратда Дагъустандин интернациональный гьакъикъи руьгь ава. Ида авар халкьдин шаирдин яратмишунри ам неинки вири Дагъустандин, гьакI советрин гзаф миллетрин литературадин, СССР хьтин зурба уьлкведин векилдиз элкъуьрна, — лагьана премьер-министрди.
Къейд ийин хьи, сифте яз «Лацу дурнайрин йикъар» Гуниб хуьре 1986-йисан 6-августдиз кьиле тухванай. А вахтунда халкьдин вилик «Дурнаяр» манидин авторар Расул Гьамзатовни композитор Ян Френкель раханай. И вакъиа сад лагьай каналди вири Советрин Союздиз аквадайвал къалурнай. Зурба шаир рагьметдиз фейидалай гуьгъуьниз шииратдин сувар международный Гьамзатован фестивалдиз элкъуьрна, ам шаир хайи югъ тир 8-сентябрдиз тухудайвал авуна.
8-сентябрдиз Дагъустан Республикадин Кьил Сергей Меликова, РД-дин Гьукуматдин Председатель Абдулмуслим Абдулмуслимова, шаирдин руш, П. Гьамзатовадин тIварунихъ галай Изобразительный искусствойрин музейдин директор Салигьат Гьамзатовади Тарки-Тау дагъда авай вири дуьньядиз машгьур автордин сурал цуьквер эцигна.
Зурба шаир рикIел хкунин мураддалди анал писателрин ва жемиятдин организацийрин векилар, РД-дин Халкьдин Собранидин депутатар, министерстводин патай ведомствойрин чIехибур ва уьлкведин бязи регионрин векилар атанвай.
Республикадин регьберри, яратмишзавай идарайрин векилри ва мугьманри Махачкъалада авай Расул Гьамзатован памятникдал цуьквер эцигна. Вири дуьньядиз машгьур Дагъустандин шаирдин 102 йис тамам хьуниз талукьарнавай суварин сергьятра аваз, вице-премьер Муслим Телякавова, РД-дин культурадин министр Зарема Бутаевади, шаирдин руш Салигьат Гьамзатовади шаирдин тIварунихъ галай куьчеда авай памятникдални цуьквер эцигна.
Урусрин М. Горькийдин тIварунихъ галай драмтеатрдин дараматдин вилик квай майдандал хкажнавай монумент шегьердин лап гуьрчег чкайрикай сад я. Скульптор Мегьамед-Али Алиева яратмишнавай и памятник Махачкъалада 2010-йисуз эцигнай.
Международный «Лацу дурнайрин йикъар» Гьамзатован фестиваль Ленинан Комсомолдин тIварунихъ галай паркуна авай Азадчи-аскердин памятникдин вилик шад гьалара ачухна.
А. Абдулмуслимова къейд авурвал, и сувар, шаирдин фикирдалди, Ватандин ЧIехи дяведин вири женгера телеф хьайи ва ватан душмандикай хвейи, инсаният фашизмдикай азад авур аскерар рикIел хуьнин, абуруз гьуьрмет авунин лишан яз тешкилайди я. ЧIехи Гъалибвилин 80 йис шад гьалара къейдзавай вахтунда шаирдин чи игит халкьдин гъалибвилиз баркалла лугьузвай чIалари мадни сеслудаказ ванзава. Гзаф миллетрин литературади арадал гъизвай къаматри акьалтзавай несил тербияламишзава. Хъсан крар несилрилай несилрал агакьарзава. 1941-1945-йисара чи чIехи бубайри Ватан гьикI хвенатIа, къе дяведин махсус серенжемда иштиракзавай чи кьегьалри бубайрин баркаллу крар, адетар викIегьвилелди давамарзава, государстводин итижар намуслувилелди, жуьрэтлувилелди хуьзва. Ватан хуьзвайбурун йисуз «Лацу дурнаяр» чи кьегьалар рикIел хуьзвай, несилрин алакъаяр чIур тийидай яржуниз элкъуьрай.
Фестивалдин мярекатра Москвадай, Санкт-Петербургдай, Донбассдай, Башкириядай, Татарстандай, Чувашиядай, Палестинадай ва Кеферпатан Кавказдин регионрай атанвай писателри, шаирри, литературоведри иштиракна.
Хийир Эмиров
