СтIал Сулейманан райондик акатзавай Сийидхуьр Кьасумхуьруьвай 3 километрдин яргъа, Чирагъ вацIун эрчIи къерехда экIя хьанва. Сийидхуьруьн тIвар арадал атуникай артухан баянар гунин чарасузвал авач: адал хуьруьн бине кутурдан тIвар акьалтнава.
И хуьр арадал атай вахт малум туш. Куьгьне хуьр цIийи хуьруьвай 3 километрдин яргъа мензилда, Цмурдихъ фидай рекьив гвай.
1886-йисан переписдин делилралди, хуьре 58 майишат ва 218 агьали (153 итим ва 128 дишегьли) авай. Виликдай ина хъвадай цин патахъай еке дарвал авай. Дишегьлияр жигъирдай тIуз са километрдин мензилдиз вацIуз эвичIна, анай кварара аваз яд гъуниз мажбур жезвай.
1957-йисуз сийидхуьруьнвийри багъманчивални майвачивал еримлу ийидай вири шартIар авай дуьзенлухдиз куьч хьун кьетIна. ЦIийи хуьр Чирагъ вацIун къерехда, Курхуьруьн къаншарда ава. Чирагъ вацIал алай муьгъ архитектурадин гуьмбетрик акатзава.
Чи йикъара хуьре 605 кIвал ава, 1250-далай гзаф агьалияр яшамиш жезва. Сийидхуьр Кьасумхуьруьн администрациядик акатзава.
Мурад Мегьамедкеримован
«СтIал Сулейманан район: тарихдин гелерай» ктабдай.
