Дагъустанда Украинада кьиле физвай махсус серенжемдин ветеранриз, иштиракчийриз, абурун хизанриз кьетIен фикир, яшайишдин рекьяй куьмекар гузва. И месэла республикадин Кьил Сергей Меликова хсуси гуьзчивилик кутунва.
И гьафтеда Махачкъалада «Доблесть гор» программадин иштиракчийрихъ галаз гуьруьш кьиле фейи юкъуз СВО-дин ветеран Гьажимурад Къазанбиеваз, савкьат яз, цIийи улакь пишкешна. И вакъиадиз талукьарнавай мярекатда Сергей Меликовани иштиракна.
РикIел хкин, махсус серенжемда вичин хиве тунвай везифаяр кьилиз акъуддайла, дагъустанви аскер душмандин дронрин гьужумдик акатна. Нетижада Гь.Къазанбиеван гъилелни кIвачерал залан хирер хьана. Недай-хъвадай суьрсетни саки амачиз, 21 юкъуз ам текдиз блиндажда амукьна. Гуьгъуьнлай ам авай чкадив куьмек агакьна ва аскер къутармишна.
Къейд ийин хьи, идалай вилик Дагъустанда СВО-дин мад 3 ветерандиз, савкьатар яз, улакьар пишкешнай. И жигьетдай асул кIвалах «Защитники Отечества» фондуни кьиле тухузва.
«Лезги газет»
