Къуба уезддин Агъа Лакарин хуьре Кичибеган хизанда дидедиз хьана. Чал агакьнавай шииррай адахъ, шаксуз, чIехи бажарагъ авайди аквазва. А. Мирзебегова кхьизвайвал, гъвечIи чIавалай халкьдин манийрин ва макьамрин гуьрчегвилин таъсирдик акатай ада, вахт алукьайла, вичини чIалар теснифиз ва абур чуьнгуьрдин гьавадик кваз тамамариз эгечIна. Мехъеррик ва межлисрик рикI алай мугьман тир ам Къуба патан хуьрера машгьур хьана.
Сифте яз ашукь Ягьядин эсерар гьеле 30-йисара СССР-дин АН-дин Азербайжандин филиалда кIвалахзавай Хузеймет Къадимова кIватI хъувуна. И кас вични шаир тир. Дерин чирвилер авай Х. Къадимоваз РагъэкъечIдай патан ва Европадин халкьарин са шумуд чIал чидай. Адан вичин шиирарни лезги чIалал печатдиз акъатна, гьатта урус чIалазни таржума авунва. Ада лезги чIалай, милли тарихдай, фольклордай къиметлу материалар кIватIна. Абурук ашукь Яхьядин шиирарни квай. А шииррикай «РикIин гаф» ва маса газетризни журналриз, А. Къардаша таржума авуна, урус чIалални акъатнава.
«Лезги газетдин» 2025-йисан 33-нумрадай
