1-сентябрдиз, виринра хьиз, меркез­дин 9-нумрадин лицейдини кIелунин цIийи йис линейкадилай башламишна.­ Муал­лимрихъ, аялрихъ, абурун диде-бу­бай­рихъ галаз санал и мярекатда гьуьр­мет­лу мугь­манрини иштиракна. Абурун арада Да­гъустандин юстициядин ми­нистер­ст­водин патав тешкилнавай общественный советдин председатель И.М. Мегьамедовни авай.

Ислам Мурадовича, лицейда кIелзавай, гьакI иниз сифте кам къачунвай бицIекрихъ элкъвена, хъсан кIелунихъ, дерин чирвилер къачунихъ гележег патал авай важиблувал къейдна, кIелунин цIийи йисуз агалкьунар хьун алхишна.

Гуьгъуьнлай ада лицейда кIелзавай­бу­рухъ галаз са шумуд классда тарих рикIел хуьниз, ватанпересвилин руьгьдаллаз тербияламишуниз талукьарнавай серенжемни кьиле тухвана. Тарих неинки вахт ва ва­къиаяр, гьакIни чун алатай девирдихъ галаз алакъалу ийизвай, чи къенин югъ тайинарзавай ва гележег вичелай аслу тир чан алай гъал тирди къейдна. Ада жегьил несилдиз тарих рикIелай алуд тавуниз, ам чируниз, гележегдин несилрални агакьаруниз, тарихдал дамах авуниз эвер гана.

Ислам Мурадовичан суьгьбет аялриз хуш хьанвайди кьатIунин четин тушир. Абуру суалар гузвай, тарихдай чпиз чидай бязи месэлаяр веревирдзавай. Ихьтин серенжемри, шаксуз, акьалтзавай несил лайихлудаказ тербияламишунин рекье еке роль къугъвазва.

*  *  *

Вирироссиядин «Собери ребёнка в школу» серенжемдин сергьятра аваз, Росгвардиядин Дагъустан Республика­да авай управленидин, гьакI Россия­дин­ милли гвардиядин Махачкъаладин­ военный частунин къуллугъчийри, кIва­лахдин рекьяй везифаяр кьилиз акъуддайла, телеф хьайи чпин юлдашрин хизанрай тир аялриз школадиз гьазурвал акун патал куьмекар гана. Къейд ийин хьи, абуру и серенжемда гьар йисуз иштиракзава. 

Кьилди къачуртIа, росгвардиячияр­ «Яст­реб-Каспий» СОБР-дин, «Ягуар»­ ОМОН-дин ва вневе­домственный охра­на­дин­, Ма­хачкъаладин­ военный частунин къуллугъчийрин, санлай къачурла, 11 хизандиз мугьман хьана. Абуру аялриз алукIдай пек-пар­тал маса къачудай пулдин пишкешар, гьакI школада лазим шейэр гана. Мугьманри телеф хьайи игитрин аялрихъ, гьакI хендедайрихъ галазни суьгьбетарна. Яшайишдин хиляй ва маса месэлаяр аватIа хабарар кьуна. Аваз хьайитIа, гьам кьиле авай ксар, гьамни вири личный состав абур гьялиз гьазур тирди къейдна.

Рагнеда Рамалданова