Украинада кьиле физвай махсус серенжемда иштиракзавай Ахцегь райондай тир аскерри чпиз ва чпин хизанриз куьмекар гунай муниципалитетдин кьил Абдул-Керим Палчаеваз сагърай лагьана.
Аскерри къейдзавайвал, райондин администрацияди СВО-дин иштиракчийрин месэлаяр гьялуниз кьетIен фикир гузва. Абурун дердияр кьуру гафаралди, хиве кьунралди ваъ, краралди кьилиз акъудзава.
Къейд ийин хьи, Ахцегь район республикада, СВО-дин зонадиз недай-хъвадай суьрсет, яшайишда герек къведай жуьреба-жуьре затIар рекье тунал гьалтайла, сифте жергейра авай муниципалитетрикай сад я. Дяведин гьерекатра иштиракзавай аскерриз, хайи районрай, хуьрерай багъри чилин ни галай затIар агакьайла, кьадарсуз шад жезва, абур мадни руьгьламиш жезва. Идалай гъейри, СВО-дин зонада авай аскеррив далу патай гьикьван мукьвал-мукьвал куьмек агакьайтIа, гъалибвални гьакьван мукьвал жезва.
Ахцегь райондин администрация Украинада кьиле физвай махсус серенжемдин иштиракчийриз ва абурун мукьва-кьилийриз идалай кьулухъни алакьдай вири куьмекар гуз гьазур я.
Чи мухбир
