Алатай гьафтеда СтIал Сулейманан райондин кьил Саид Темирханов муниципалитетдай тир ва Украинада кьиле физвай махсус серенжемда иштиракзавай аскеррин, абурун мукьва-кьилийрин арзайриз килигна, абурухъ авай месэлаяр гьялунин карда куьмек гудай мумкинвилер веревирдна.
Санлай къачурла, райондин кьилин патав Кьасумхуьр, ДаркIуш-Къазмаяр, Агъа СтIал, Герейханован, ЦIийи Мамрач, Эминхуьр, Сайтархуьр, Курхуьр ва Ичин хуьрерай 20-далай виниз инсанар атанвай. Абуру газдалди, электричестводалди, целди таъминарунин, рекьер цIийикIа туькIуьр хъувунин ва абур авадан авунин, медицинадин рекьяй куьмек гунин, кIвалахал акъвазунин, СВО-да телеф хьайи аскеррин экуь къаматар эбеди авунин ва маса месэлаяр къарагъарна.
Месэлаяр веревирд авунин ва абур гьялдай рекьер тайинарунин кардал райондин администрациядин жавабдар къуллугърин, идарайрин векиларни желбнавай. Саид Темирханова къейд авурвал, гьар са месэладиз кьетIен фикир гуда ва абур гьялунин кIвалах вичин хсуси гуьзчивилик кутада.
Гаф кватай чкадал лагьана кIанда, республикадин хейлин маса муниципалитетра хьиз, СтIал Сулейманан райондани СВО-дин иштиракчийрин, абурун хизанрин месэлаяр гьялуниз кьетIен фикир гузва. Муниципалитетдин администрациядин пресс-къуллугъдин делилралди, СтIал Сулейманан райондай алай вахтунда СВО-да иштиракзавай гьар са касдиз талукь махсус паспорт арадал гъанва ва анра абурухъ авай месэлаяр, хизанрин игьтияжар къейднава. Къенин юкъуз районда 45 иштиракчидин мукьва-кьилияр кIвалахдай чкайралди таъминарнава, чилин 22 участок чара авунва. Аскеррин ва я абурун мукьва-кьилийрин тIалабунралди 45 куьче цIийикIа туькIуьр хъувуна, авадан авунва. Украинада кьиле физвай махсус серенжемда телеф хьайибурун экуь къаматар эбеди авун патал мемориалдин 40-далай виниз кьулар туькIуьрна, 8 касдин тIварар мектебриз гана.
Саид Темирханова СВО-дин иштиракчийрин, абурун мукьва-кьилийрин месэлаяр гьялун администрациядин кар алай везифайрикай сад тирди къейдна ва тайин са карда игьтияж авай гьар са касдин гьарайдиз гьай лугьудайдахъ инанмишарна.
Чи мухбир
