Алатай гьафтеда Санкт-Петербургда залан атлетикадай кьиле фейи Россиядин чемпионатда чи ватанэгьли Исмаил Гьажибегова 55 кг-дал къведалди заланвал авайбурун арада инанмишвилелди гъалибвал къазанмишна, уьлкведин чемпионвилин тIварцIиз гила ам 4-сеферда лайихлу хьанва. Нубатдин чемпионатда чи ватанэгьлиди, санлай къачурла, 232 кг (рывокда — 105 кг ва толчокда — 127 кг) хкажна.
РикIел хкин: Исмаил Гьажибегован ери-бине Докъузпара райондин Мискискарин хуьряй я. Тренер Гьуьсенхан Закарьяеван гъилик вичин устадвал хкажзавай чи ватанэгьли, уьлкведин чемпионатрин гъалибчи хьиз, кьведра призёр, гьакI Россиядин кубокрин сагьибни я.
Шадвилелди мадни а кар къейд ийиз кIанзава хьи, дагъустанвийрикай залан атлетикадай ихьтин еке агалкьун къазанмишиз алакьнавай ам сад лагьай спортсмен я.
Рагнеда Рамалданова
