Алатай гьафтеда Мегьарамдхуьруьн райондин кьил Фарид Агьмедова Украинада кьиле физвай махсус серенжемда иштиракзавай пуд аскердихъ галаз гуьруьш кьиле тухвана. Идакай «Лезги газетдиз» муниципалитетдин администрациядин пресс-къуллугъди хабар гана.

Гьамидуллагь Арасханов райондин администрациядин къуллугъчи Исмаил­ Арасханован хва я. СВО-да женгинин рекьяй вичин хиве тунвай везифаяр намуслувилелди кьилиз акъудунай адаз Рос­гвардиядин шабагь — III дережадин «За проявленную доблесть» медаль ганва.

Стхаяр тир Сеймур ва Теймур Эзбероври СВО-да къуллугъ авун чпин кьилин везифайрикай сад яз гьисабзава. РикIе ихьтин къаст авай стхайри дяведин махсус серенжемда иштиракиз са кьадар вахт алатнава. Женгинин рекьяй тайин­ алакьунарни чирвилер хьанвай дирибаш стхайри командованиди чпел ихтибарзавай везифаяр кьегьалвилелди кьилиз акъудзава.

Гуьруьшдал Фарид Агьмедова аскерривай абурун уьмуьрдикай, яшайишдин месэлайрикай, гьялна кIанзавай дердийрикай хабар кьуна. Чпин нубатда СВО-дин­ иштиракчийри райондин кьилиз чпихъ авай месэлайрикай хабар гана. Фарид Агьмедова къейд авурвал, Украинада кьиле физвай махсус серенжемда Мегьарамдхуьруьн райондай иштиракзавай ас­керриз, абурун хизанриз куьмекар гуниз, абурун дердияр гьялуниз администрацияди кье­тIен фикир гузва, гуьруьшдал къарагъарай месэлаярни, энгел тавуна, гьялда.

Агьмед  Магьмудов