Ахцегь районда хъвадай цин «Лала дере-Ахцегь» турба тухунин кIвалахар худда гьатнава. И йикъара анал кьиле физвай эцигунрин кIвалахрихъ галаз муниципалитетдин кьил Абдул-Керим Палчаев таниш хьана.
Райондин администрациядин пресс-къуллугъдин малуматралди, августдин вацран эхирралди Цуругърин мулкара чпе, санлай къачурла, 1000 куб яд гьакьдай, яд кIватIдай чкаяр кардик кутадайвал я. Гуьгъуьнлай цин турбаяр тухунив эгечIда. Алай йисуз 13 километрдин мензилда цин турбаяр тухун фикирдиз къачунва.
Чешмеди хабар гузвайвал, «Лала дере-Ахцегь» водопроводди районда хъвадай цин месэладин патахъай авай кьитвал михьиз арадай акъудда. Кьилинди ам я хьи, чкадин агьалийрал хъсан еридин михьи яд агакьда.
Объектдал кIвалахар тамамдиз 2027- йисан эхирралди акьалтIардайвал я.
Чи мухбир
