Къиметриз талукь яз
«Авито Авто»-дин экспертри автомобилрин машгьур маркайрин ва моделрин ахтармишун кьиле тухвана ва СКФО-дин — Дагъустандилай Ингушетиядал кьван — жуьреба-жуьре регионра абурун юкьван къиметар гекъигна. Идакай «Дагъустан» РИА-ди хабар гузва.
Виле акьадай хьтин дегишвал Ставрополдин крайда кьиле фенва, цIийи автомобилрин юкьван къимет 19 процентдин агъуз аватнава. Гила ам 2 миллионни 199 агъзур манатдикай ибарат хьанва. Хабар гузвайвал, Дагъустанда, акси яз, юкьван къимет 8 процентдин виниз акъатнава — 2 миллионни 831 агъзур манат.
Гьа са вахтунда раижзавайвал, «гьалнавай» автомобилрин базарда гьалар дурумлубур я: юкьван гьисабдалди округда машинар 4,2 процентдин ужуз хьанва. Къимет гзаф агъуз аватун иллаки Кеферпатан Осетияда къейднава — 5,2 процентдин. Ина юкьван къимет 455 агъзур манат я. Чечняда къимет 5,3 процентдин агъуз аватнава (900 агъзур манатдал кьван), Ставрополдин крайда — 4,6 процентдин (800 агъзур манат). Дагъустанда лагьайтIа, 3,5 процентдин ужуз хьанва — 820 агъзур манатдал кьван.
Са жерге мярекатар
2025-йисуз Дагъустанда дигидай цин комплексдин 13 объект бинедилай ремонт авунин кIвалахар кьиле тухуда. Идакай РД-дин Гьукуматдин телеграм-каналди хабар гузва.
Кьилди къачуртIа, чешмеди, Дагмелиоводхоздин кьил М. Юсупован гафарал асаслу яз, раижзавайвал, 2024-йисуз госпрограммадин сергьятра аваз 6 объект цIийикIа туьхкIуьрунин мярекатар акьалтIарна. Абур кардик алай йисуз кутунва.
Къейдзавайвал, Дагмелиоводхозди арадал хкунин кIвалахар 2025-йисуз давамарзава. И макьсадар патал, федеральный субсидийрилай гъейри, 125 миллион манатдилай гзаф бюджетдилай къецяй тир такьатарни харж авун пландик кутунва.
ИкI, 403,7 километрдин мензилда 54 объектдал къаналар михьзава.
13 объект капитальнидаказ ремонт авунин кIвалахар кьилиз акъудзава.
ГъвечIи Сулак къаналдал, Махачкъаладин Кировский районда К-4-I коллектордал, Миграгъ-Къаракуьре ва Аламишедин майишатрин арада авай къаналрал, гьакIни Семендер поселокда КОР-дин участокдал тIебиатдин шартIарин нетижада хьайи аварияр арадай акъуднава.
«Бороздиновская прорва» магистральный къанал михьи авунин кIвалах кьиле тухванва.
Гьа са вахтунда М. Юсупова къейдзавайвал, 2024-йисуз агьалийри гьукуматдин жуьреба-жуьре органриз шикаятар ийиз хьайи къаналар во коллекторар ремонт ва михьи авунин кIвалахар кьилиз акъудиз алакьна. И кIвалахар идаради бюджетдилай къецяй тир такьатрин гьисабдай авуна.
Саки 8000 зенг
2025-йисан январь-июль варцара Дагъустандин зегьметдин министерстводи атай 7812 зенг ахтармишна. Абурукай 2087 ЕКЦ-дилай (Единый контактный центр) атанва, 1700 зенг РД-дин зегьметдин министерстводин кIвалахдиз талукь тушир месэлайрин гьакъиндай кьабулнава. Идакай, РД-дин зегьметдин министерстводин пресс-къуллугъдал асаслу яз, «Дагъустан» РИА-ди хабар гузва.
Къейдзавайвал, республикадин агьалийри экуьнин сятдин 9-далай нянин сятдин 6-дал кьван зенгерзава (9:00 — 18:00), ял ядай вахт фикирда кьуналди (13:00 — 14:00).
Агьалийрин зенгериз жаваб гудайла, герек месэладин гьакъиндай тамам баянар гунин игьтияж аваз хьайитIа, пешекарди вичел атанвай зенг талукь идарайрин къуллугъчийрал ракъурдайвал ийизва.
Ведомстводин оператордин гафаралди, гзафни-гзаф агьалийри ихьтин темайрай хабарар кьазва: электроэнергия, яд хкудунин, гзаф аялар авай хизанриз региондин выплатаяр тайинарунин, коммунальный къуллугърай яшайишдин кьезилвилерин (льготы) гьакъиндай… ва мсб…
Хабар гузвайвал, пешекардин компьютердал кьве программа эцигнава. Абуру агьалийрилай къвезвай зенгер гуьзчивилик кутадай мумкинвал гузва. Абурукай сад региондинди я, адан куьмекдалди шегьеррин ва районрин агьалийри «ифей линиядиз» зенгзава — 64-15-04, кьвед лагьай программа — «Агьалийрихъ галаз алакъа хуьдай Сад тир контакт-центр» («Единый контакт-центр взаимодействия с гражданами» (ЕКЦ) информациядин система я — 8 (800) 100-00-01. Им, арада мензил аваз алай вахтунин режимда агьалийриз абурун месэлаяр гьялиз куьмекзавай яшайишдин идарайрин информациядин система я.
Гьазурайди — Муса Агьмедов
