Алатай гьафтедин эхирра РД-дин Гьукуматдин Председателдин заместитель Нариман Абдулмуталибов Докъузпара райондиз мугьман хьанвай. Ина ам чкадин са шумуд агьалидин арзайриз килигна ва муниципалитетдин администрациядин къуллугъчийрихъ галаз совещание кьиле тухвана.
Вице-премьерди кьабулай агьалийри чпин арзайра мулкар авадан, Украинада кьиле физвай дяведин махсус серенжемдин иштиракчийриз чилер чара авуниз, хуьруьн майишатдин метлеб авай мулкар тамамдиз дигидай целди таъминаруниз, электричестводин симер фенвай куьгьне шалманар цIийибуралди эвезуниз, трансформаторар дегишаруниз талукь месэлаяр къарагъарна.
Кьилди къачуртIа, Килерин хуьряй тир Низами Беделова вацI яшайишдин кIвалер авай чилериз мукьва хьанвайдакай, нагагь къати марфар къвана, селлер атайтIа, кIвалериз зиянар жедайдакай хабар гана. Адан фикирдалди, и месэла, энгел тавуна, гьялна кIанзавайбурукай я.
Муниципалитетдин кьилин заместитель Марат Крымова Нариман Абдулмуталибовавай къишлахриз куьчарзавай гьайванар хуьзвай чилер райондин хсусиятдиз вахкунин карда куьмек тIалабна. И кар авурдалай кьулухъ абур СВО-дин иштиракчийрин арада пайдай фикирар ава.
Мискискарин хуьруьн агьали Исми Мирзоева Ахцегьрин дигидай цин къаналдай Докъузпара район галайвал цин цIийи хилер кардик кутунватIани, муниципалитетдин хуьруьн майишатдин метлеб авай хейлин чилерив яд агакь тийизвайди ва, гьикьван алахъунар авунатIани, месэла гьял тахьанвайди къейдна.
Къалажухви Ирван Мусаева РД-дин Гьукуматдин Председателдин заместителдиз сетра электричестводин къуват лап тIимил тирдакай ва идакди муниципалитетдин бязи хуьрерин агьалияр яшайишда гзаф четинвилерал ацалтзавайдакай лагьана.
Нариман Абдулмуталибова райондин администрациядин векилрал къарагъарнавай гьар са месэла дериндай ахтармишун ва гуьгъуьнлай гьялун патал абурун гьакъиндай гегьенш справкаяр гьазурун тапшурмишна. Арзаяр гваз атай агьалийри вице-премьерди чпи къарагъарай месэлаяр гьакъикъатдани гьялиз куьмекдайдак умуд кутуна.
Чи мухбир
