Гьар йисан августдин вацран 2-кишдиз чи уьлкведа физкультурникрин югъ къейдзава. ЦIи лагьайтIа, ам 9-августдал ацалтна. И юкъуз чи республикада спортдин са жерге серенжемар кьиле тухвана.

ИкI, Мегьарамдхуьруьн райадминистрациядин пресс-къуллугъди хабар гузвайвал, райондин кьил Фарид Агьмедова, спортсменриз, тренерриз, спортдин ветеранриз, гьакI спортдал машгъул жезвай ва сагълам уьмуьр кечирмишзавай вири ксариз физкультурникрин югъ тебрик авунихъ галаз сад хьиз, спортдин хиле агалкьунар къазанмишнавай са жерге ксарив шабагьар вахкана. Къенин юкъуз спорт ва физкультура вилик тухуниз — уьлкведин дережада аваз кьилиз акъудзавай важиблу месэлайриз — районда еке фикир гузвайдал фикир желбна, массовый ва пешекарвилин спорт активнидаказ вилик тухузвайди, спортдин хъсан адетар арадал атанвайди, гьам муниципальный, гьам республикадин акъажунар тешкилзавайди, Вирироссиядин дережадин серенжемра иштиракзавайди ва виринра хъсан нетижаяр къазанмишиз алакьзавайди къейдна.

Рагнеда Рамалданова