“Лезгияр” сайтдай хабар хьайивал, вичин ери-бине Ахцегьай тир “нафтIадин магнат”, Россияда виридалайни девлетлу карчийрикай сад Сардаров Рашид Селимовича Оренбург шегьерда газ гьялдай заводдин патав, нафт гьялдай чIехи комплекс эцигзава. Адан къурулушдик нафтIадин ва битумдин тадаракар, метягьрин ва хаммалдин паркар, машинрин ва ракьун рекьин терминалар, комплекс электроэнергиядалди ва бугъадалди таъминарун патал гъвечIи ТЭЦ ва герек маса тадаракар акатзава.
— Заз Оренбуржьеда нафт гьялдай махсус комплекс эцигдай фикир аваз гзаф йисар тир, гила къарар кьабулнава, — лугьузва “ЮУПК” ЗАО-дин президент Рашид Сардарова. Им Кьиблепатан Уралдин промышленностдин компаниядин вилик гегьенш мумкинвилер ачух жезва лагьай чIал я, гьикI хьи, девирдин истемишунриз жаваб гузвай цIийи комплексди углеводородрин хаммал гьялдай къуватар хейлин артухарда ва карханади акъудзавай суьрсетдин кьадардизни еридиз хъсан таъсирда.
Оренбуржьедин губернатор Юрий Берга къейд авурвал, Кьиблепатан Уралдин промышленностдин компанияди Оренбургдин областдин экономика вилик тухунин сиясатдиз тамамвилелди жаваб гузва. Чи кьилин мурад-метлеб паталай инвестицияр желб авуналди, производство артмишун, кIвалахдай цIийи чкаяр арадал гъун, тIебиат хуьнин ва яшайишдин жигьетдай карханайрин жавабдарвал артухарун я.
Гьелбетда, Дагъустандай фена, Оренбургда, Москвада ва масанра (адаз пара чкайра вичин карханаяр ава) уьлкведин производство хкажуник вичин пай кутаз алакьун тарифуниз лайихлу кар я. Гьа са вахтунда къейд ийин хьи, баркаллу ватанэгьлидин рикIел хайи ерийрани яшайишдинни экономикадин месэлаяр гьялун атанайтIа, хъсан жедай.
Сардаров Рашид Селимович 1955-йисан 27-июндиз Махачкъалада дидедиз хьана. РАН-дин профессорвилин дережадиз хкаж хьайи буба Селим Сардарова вичин зегьметдин ва илимдини рехъ Ахцегьрин 1-нумрадин юкьван школада физикадин муаллимвилелай башламишна. Адан стхаяр тир Гьажидикай военный духтур, полковник, Германияда кIелай Гьажи-Мегьамедакай муькъвер эцигунин рекьяй архитектор, илимрин доктор хьана, ДГУ-да физикадин муаллимвилин, Новочеркасск шегьерда инженер-геологвилин пешеяр къачуна, хайи хуьруьз хтай Серкера Къизил дереда геолого-разведкадин дестедик кваз ва гуьгъуьнай Ахцегьа муаллимвиле кIвалахна.
Р.Сардарова Даггосуниверситетда геофизикадин рекьяй кьилин образование къачуна. 1983-1985-йисара ада Бакуда Вирироссиядин илимдинни ахтармишунрин институтда геофизикадин къайдайралди разведкадин геохимический полигондин начальниквиле кIвалахна. Гуьгъуьнлай геофизикадин ВНИИ-да физикадинни геофизикадин дестедин регьбер хьана. 1991-йисалди “Интерсоюз” обществодин генеральный директорвилин везифаяр тамамарна. 1991-йисалай “Южно-Уральская промышленная компания” холдингдин генеральный директор я.
Уьлкведа девлетлу бизнесменрикай сад тир Рашид Селимович Москвадин Английский клубдин член ва аслу тушир “Граждан общество” Ассоциациядин президиумдин сопредседатель я. Ам гьуьрметдин “Общественное признание” — къизилдин лишандин ва гзаф маса шабагьрин сагьиб я. Машгьур Сулейман Керимовахъ галаз санал ада Москвадин Соборный мискIин эцигунра куьмекна ва мергьяматлувилин маса крарани жумартвал къалурзава.
Дашдемир Шерифалиев
