Малум тирвал, 11-августдиз къвайи гужлу марфарин нетижада, Самур вацIа ятар бул хьуникди, ЦIийи Каракуьредин хуьряй физвай, автомобилрин республикадин метлеб авай рекьин эрчIи къерех ци тухвана, улакьри гьерекатзавай шегьре рекьиз хасаратвал ганвай.
«Докъузпара район» МР-дин кьил Абдурагьим Алискеров тади гьалда рехъ туьхкIуьр хъувунин къайгъуда гьатна. РикIел хкин, икьван гагьда райадминистрациядин къуватралди ва такьатралди ЦIийи Каракуьредин хуьряй элячlдай рехъ вахтуналди кардик кутунвай.
Исятда хаталувал арадал гъанвай участокда ремонтдин кIвалахар тухванва.
Къе, 28-августдиз, туькlуьр хъувунвай рекьин участок ахъай хъийидайдакай Дорстройтехдин тешкилатдин векил, кIвалах кьиле тухузвай участокдин начальник Исрафил Омарова малумарна. Рехъ цlийи хъувунилай гъейри, гележегда рекьин участок ци тухун тавун патал адан диб мягькемарунин кlвалахар давамардайвал я.
«Лезги газет»
