И йикъара «Сад тир Россия» партиядин приемныйда инсанар кьабулдай сад тир йикъан сергьятра аваз СтIал Сулейманан районда дяведин махсус серенжемдин иштиракчийрин ва абурун хизанрин арзайриз килигна.
Приемныйда агьалияр райондин администрациядин кьилин жемиятдин хатасузвилин рекьяй заместитель Абуталиб Фатулаева, кьилин сад лагьай заместитель, чкадин отделенидин политсоветдин член Заур Къагьриманова ва партиядин чкадин отделенидин крар идара ийидай секретарь Фарид Гьамидова кьабулна.
Агъа СтIал-Къазмайрилай тир дяведин махсус серенжемдин иштиракчи Фарид Къарабегова хсуси кIвал эцигун патал вичиз чилин участок чара авунин гьакъиндай арза авуна. И месэла гьялун СтIал Сулейманан райондин муниципалитетдин эменнидин ва чилин гьакъиндай управленидал ва «Ашагастальский» СП-дин регьбердал тапшурмишна.
КIварчагърин хуьряй тир СВО-дин иштиракчи Сережа Къурбаналиеван бубади хуьруьн Ф. Наврузован тIварунихъ галай куьчеда асфальт тун тIалабна. Райондин капитальный эцигунрин, ЖКХ-дин ва аваданламишунин рекьяй управленидал КIварчагърин хуьруьн куьчеда асфальт твадай гьихьтин мумкинвилер аватIа чирун тапшурмишна.
Приёмныйдиз атай мад са агьалиди — Рашид Агъаева — вичин дуст, дяведин махсус серенжемда уьтквемвилелди женгер кьиле тухудайла телеф хьайи РФ-дин Игит Султан Сулейманован тIвар эбеди яз рикIел хуьнин гьакъиндай теклиф гана.
Заур Къагьриманова малумарайвал, райондин администрация и важиблу месэладал машгъул жезва. ИкI, Кьасумхуьруьн са куьчедиз Игитдин тIвар гуда. ГьакI ЦIийихуьруьн юкьван школани Игитдин тIварцIихъ яда. Ам яшамиш хьайи куьчедин цлал мемориалдин кьулни эцигда.
Райондин администрациядин векилри кьабулай инсанриз гьар са месэладин патахъай дуьзгуьн жавабар гана, авай мумкинвилерикай лагьана ва талукь идарайривай инсанрин тIалабунар вахтунда кьилиз акъуддай мумкинвилер жагъурун истемишна.
Абад Азадов
