Алай вахт цIийи технологийринди я. Инсанри чIехи­далай гъвечIидалди интернетдикай, мобильный телефонрин аппаратрикай, компьютеррин жуьрейрикай менфят къачузва. Гьавиляй лугьунни ийизва: «Къенин девир ктаб­ринди, газетринди туш». За фикирзавайвал, гьакI лугьузвайбур ягъалмиш я. Дуьньядин библиотекайра, музейра, архивра­ лап къадим девиррин ктабар­, газетар хуьзва­. Жуь­реба-жуьре хиле­рин пешекарри абу­рукай чпин кIва­лах­да менфят къачузва. Алай девирдани­ библиотекайра авай руьгьдин девлет гзафбуруз герек­ къвезва. Яни ктаб­рин алем са вахтундани герексузди яз амукьдач. Адахъ гьамиша игьтияж жеда. ГьикI лагьайтIа, ктабда кхьенвай гафар инсанри девиррилай девиррал агакьарзава­. Абурукай къвезвай гьар са цIийи несилдини менфят къа­чуз­ва­. И кардихъ инанмиш тирвиляй дуьньядин шаирри­, писател­ри чпин кеспи давамарзава, халкьари кIелун патал цIийи-цIийи эсерар яратмишзава. Абурухъ галаз — Дагъус­тандин яратмишунрал машгъул ксарини. Агъадихъ чна кIелзавайбуруз «Мавел» издательствода акъуднавай ктаб­­рикай куьруь малуматар гузва.

ИкI,  милли шииратдин агъсакъал, Дагъус­тандин халкьдин шаир­ Сажидин Саидгьаса­нова и йикъара 530 чиникай ибарат «Шиират­дин нагъмаяр» еке кIва­тIал акъуднава.

Сифте гафунин чкадал 1997-йисуз «Лезги га­­­­зетдин» 10-нумрадиз­ акъа­­­тай машгьур шаир­ ва драматург Ибрагьим Гьуь­сей­нован «Адан де­ре­жа» ма­къала ганва. Ада къейдзава: «Сажидинан хейлин шиирар халкьдин яратмишунрин дережадиз хкаж хьанва. «Вун накь вучиз атаначир?» шиирни фадлай халкьдин гегьенш къатара чкIанва… Сажидинан шиирри­  алай аямдин бязи гъейри шаиррин шиирри арадал те­гъизвай веревирдер майдандиз акъудзава. Етим Эминан, СтIал Сулейманан шиирри хьиз… Сажидинан шаирвилин талантдин гьайбат эвелни-эвел адан шиирдин цIарцIин дуьзгуьнвиле ава…»

Къанни кьве йис идалай вилик машгьур шаирди гайи къимет гилани квахьнавач. Сажидина мадни сересдиз яратмишзава. И вахтунда адан хейлин ктабар чапдай акъатна. 530 чиникай ибарат «Шииратдин нагъмаяр» ктабдани Сажидинан къелемдикай хкатнавай лап хъсан, яни хкянавай шиирар, риваятар, поэмаяр гьатнава.

Ругуд вишев агакьна шиирар. Шаирдин рикIик секинсузвал кутазвай вакъиаяр, месэлаяр, крар ва темаяр гзаф я. Гьар са гьерекатдиз, вакъиадиз ада вичин къимет гузва. РикIяй, дагъдин булахдай яд хьиз, акъатзавай устадлу цIараралди, гекъигунралди, мисалралди Сажидина гьар са эсердин къамат гужлу, кесерлу ва маналу ийизва. Гьавиляй абуру кIелзавайдазни таъсирзава, ам хиялрик кутазва, адав фикир ийиз тазва.

Абад  Азадов