ЧIехи Гъалибвилин — 80 йис

Ватандин ЧIехи дяведа иштиракай, жуьрэтлувилер къалурай, гьукуматдин орденризни медалриз лайихлу хьайи кьеанвийрин кьадар  тIимил туш, лайихлувилер авайди я. Лугьунриз килигайла, и хуьруьн бинеяр Закавказьеда авай Кий вацIун къерехривай куьч хьайи инсанри кутуна. Кьеанар Ялцугъринни Хутаргърин арада авай дереда са акьван чIехиди тушир вацIун патав экIя хьанвай. ВацIун кьилел алай рагални кIвалер алай.

Хуьре советрин девирдин йисара 40-дав агакьна кIвалер авай, инсанрин кьадар 130-дав агакьзавай. Кьеанар Ялцугърин хуьруьн Советдик акатзавай.

1930-йисуз ина сифтегьан школа ачухна­, 1932-йисуз «ЦIийи рехъ» колхоз тешкилна.

1941-1945-йисара хуьряй 30 кас фронтдиз фенай.

Гила чун Дагъустандин халкьдин шаир Майрудин Бабаханова РФ-дин оборонадин министерстводин ачух архиврин документ­рин бинедаллаз туькIуьрнавай «Помним поименно» ктабдай къачунвай делилрал акъвазда. Абурай малум жезвайвал, дяведин йисара Кьеанрин хуьруьн агьалийрикай Кьасумхуьруьн РВК-дай, Бакудин ГВК-дай ва маса чкайрин военкоматрай 62 касдиз Яру Армиядин жергейриз эвер гана. Абурукай 40 кас Ватандин ЧIехи дяведа телеф хьана ва я гел галачиз квахьна. Кьеанвийрикай гзафбуру женгера кьегьалвилер къалурна абур орденризни медалриз ла­йихлу хьана.

Ктабдай къачуна, са шумуд мисал гъин.

Мегьамедов Омар, 1912-йисуз Кьеанрин хуьре дидедиз хьана. Эрменистан ССР-дин Микоянский РВК-ди 1934-йисан 11-октябрдиз армиядиз эвер гана. Майор. Адахъ Яру Гъед (2), Яру Пайдах орденар, «Женгинин лайихлувилерай», «Дирибашвиляй», «Кавказ хуьнай», «1941-1945-йисара Германиядин винел гъалиб хьунай» медалар авай. 1956-йисан 17-октябрдиз къуллугъ куьтягьна. 1962-йисуз кьена. Кьасумхуьрел кучукнава.

Мегьамедов Къарабег, 1913-йисуз Кьеанрин хуьре дидедиз хьана. 1930-йисуз Яру Армиядин жергейриз эвер гана. Ада пияда кьушунрин командирар гьазурдай курсар акьалтIарна. 1942-йисуз, подполковникдин чинда аваз, пияда кьушунрин дивизиядин разведкадин начальниквиле тайинарна. СССР-дин Яракьлу Къуватрин ГРУ-дин къурулушда къуллугъна, США-дин Бос­тон шегьерда яшамиш хьана. Генерал-май­ордин чин къачуна. 1979-йисуз кьена.

Бабаев Мевлуд, 1917-йисуз Кьеанрин хуьре дидедиз хьана. 1940-йисуз Кьасумхуьруьн РВК-ди армиядиз эвер гана. Гвардиядин сержант. Адахъ «Дирибашвиляй», «Берлин къачунай», «Германиядин винел гъалиб хьунай» медалар авай. 2007-йисуз кьена. Эминхуьре кучукнава.

Тажибов Тажиб, 1924-йисуз Кьеанрин хуьре дидедиз хьана. 1942-йисуз Кьасумхуьруьн РВК-ди армиядиз эвер гана. Жергедин аскер. 1943-йисан 19-октябрдиз телеф хьана. Украина ССР-дин Запорожский областдин Мелитополдин райондин Мук совхоздин стхавилин сурара кучук­нава.

Фатулла Оглы Радали, 1909-йисуз Кьеанрин хуьре дидедиз хьана. 1942-йисан 20-январдиз Кьасумхуьруьн РВК-ди эвер гана. Жергедин аскер. (Маса делилар авач).

Кьеанрин хуьре са шумуд кас фронтдиз фейи хизанарни ава. ИкI, ктабдай малум жезвайвал, Демироврин хизандай 1942-йисуз пуд кас — 1915-йисуз дидедиз хьайи Ризван, 1914-йисуз дидедиз хьайи Сулейман ва 1907-йисуз дидедиз хьайи Султан фронтдиз фена. Жергедин аскер Ризван Де­миров телеф хьана (архивдин маса делилар авач). Жергедин аскер Сулейман Демиров гел галачиз квахьна. Мл. сержант Султан Демиров 1942-йисан 23-мартдиз телеф хьана, Украина ССР-дин Харьковдин областдин Сахновщиндин райондин Степановка хуьре кучукнава…

Кьеанрин къенин несилди дяведа телеф хьайи, гел галачиз квахьай ва адалай­ гуьгъуьниз кьейи кьегьалрин тIварар рикIера хуьзва.

Хазран Кьасумов