Дагъустан Республикадин Кьил Сергей Меликова 5-августдиз йикъан важиблу месэлайрай гьар вацра тешкилзавай совещание кьиле тухвана­. Анал гьукумдин органри агьалийрин­ арзайриз фикир гузвай гьалдин, республикада водителрин праваяр ва яракьдин иеси жедай ихтияр гузвай­ медицинадин идараяр гзафарунин, образованидин умуми идараяр кIелунин йисаз гьазур хьунин месэлайриз килигна.

Июлдин вацра Дагъустандин ЦУР-диз 13 агъзурдалай гзаф арзаяр атана ва абурун чIехи пай агьалияр электроэнергиядалди таъминаруниз талукьбур тир. Хъвадай яд атIунин, зирзибил вахтунда тухун тавунин месэлайризни талукь арзаяр гзаф авай.

Региондин Кьилин тапшуругъдалди РД-дин Гьукуматдин Председатель Абдулмуслим Абдулмуслимова алай вахтунда республикада мукьвал-мукьвал эквер хкудунихъ, яд атIунихъ галаз ала­къалу гьалдиз талукьарнавай гегьенш совещание кьиле тухвана. Месэла агьалияр ресурсралди таъминарзавай организацийрихъ галаз веревирдна. Июлдин вацра «Дагэнергоди» кьетIен гьалара кIвалахна. ЦУР-дин векилри гьар юкъуз къвезвай арзайриз кьилин фикир гана.

Совещанидал РД-дин АГиП-дин регь­бер Махач Омарова са шумуд мисал гъана. ИкI, Шамил районда рехъ вацIу тухвайла, Ругельда, Хиндах, Урчух, Сомода, Хонох ва Мусрух хуьрериз фидай мумкинвал амукьнач. Абур электроэнергиядикайни хкатна.

Чкадал герек техника ва махсус бригада рекье туна. Муниципалитетда арадал атанвай чIуру гьаларай экъечIуниз талукь заседание кьиле тухвана. 6-июлдилай ЧС-дин гьалар малумарна. 7-июлдиз хуьрериз электроэнергия хгана. 10-июлдиз бязи хуьрериз фидай мумкинвилер арадал гъана. 31-июлдиз «Дагес­танавтодорди» вацIу тухванвай рекьер ремонт хъувуна куьтягьна ва автотранспортдиз рекьер ачухна.

ЦУР-диз атанвай арзайриз талукь док­ладдиз яб гайидалай гуьгъуьниз Да­гъус­тандин регьберди Унцукулдин РЭС ахтармишунин ва ана къайда тунин тапшуругъ гана.

Арадал атанвай гьал рикIел хкин: кьве юкъуз Унцукул районда эквер авачир. Агьалийри и чIуру кар чкадин сетар Гумбетдин РЭС-див вахкунихъ, къуллугъчияр кIвалахдилай алудунихъ галаз алакъалу авуна. Гьа са вахтунда абуру чкадин сетарни Гумбетдин РЭС сад авунин къарар къуватдай вегьин истемишна.

Къунши районрин ремонтардай бригадайри тади гьалда район электро­энергиядалди таъминар хъувуна. РД-дин энергетикадин ва тарифрин минис­терстводи и чIуру гьал вичин гуьзчивилик кутуна.

Электроэнергиядихъ галаз алакъалу кьве идара сад хъувунин кьилин себеб менфятсуз кIвалах я. Унцукул районда ишлемишзавай электроэнергиядай анжах 53 процентдин пулар кIватIзава. Гьа са вахтунда 80 процент электроэнергия квахьзава. Законсуз майнинг кардик хьунини гьалар мадни татугайбур ийизва. Алай вахтунда 38 къуллугъчидикай 35 кас кIвалахдилай элячIнава. Абуру сад хъувунвай идарада чпи кIвалахдач лугьузва. Абурун ихьтин гьерекатри къайдадикай хкатнавай линияр ремонт авунизни манийвална.

«Вучиз чкадин сетар Гумбетдин РЭС-дик кутуна? Вучиз лагьайтIа, чкадин агьа­лийри ишлемишзавай электроэнергиядин пул гузвайтIани, ишлемишзавай электрэнергиядин 80 процент пул «Даг­энергодив» агакьзавачир. Ремонтзавай бригадайриз куьмек гудай чкадал агьалияр митингриз экъечIна. ТIалабзава: кIва­лахдилай элячIнавайбурни, сокращенидик акатнавайбурни — вири къуллугъчияр ахтармиша. Адан нетижайрикай виридаз малум хьун лазим я», — малумарна Сергей Меликова.

Совещанидал малум хьайивал, республикада водителрин праваяр ва яракьдин иеси жедай ихтияр гузвай медицинадин идараяр гзафарзава. Махачкъалада авайбурал алава яз, ахьтинбур Дербентда, Къизлярда ва Хасавюртдани ачухнава.

Республикадин психоневрологиядин­ ва наркологиядин диспансеррин каби­нет­рихъ еке учирар жезвайвиляй ва агьа­лийри гзаф арзаяр ийизвайвиляй региондин Кьили Дагъустандин маса районрани винидихъ тIвар кьунвай идарайрин филиалар ачухунин месэладиз килигун тапшурмишнай. Гзаф кьадар учи­рар арадал атуни коррупциядизни рехъ ачухзавай.

Гегьеншдиз РД-дин Кьилин сайтдай кIелиз жеда.