Мукьвара РД-дин Кьил Сергей Меликован тапшуругъдалди Украинада кьиле физвай махсус серенжемда иштиракзавай аскеррив Дагъустандин патай куьмек агакьарна. Идакай «Лезги газетдиз» республикадин Кьилин пресс-къуллугъди хабар гана.
СВО-дин зонадиз недай-хъвадай суьрсет, яшайишда герек къведай жуьреба-жуьре затIар авай улакьра аваз РД-дин Кьилин ва Администрациядин Руководителдин заместитель-РД-дин Кьилин информациядин сиясатдин ва пресс-къуллугъдин Управленидин начальник Рашид Акавов, РД-дин Кьилин куьмекчияр Саид Маматхановни Мурадхан Муртузалиев, Хасавюрт шегьердин мэр Корголи Корголиев, Казбек райондин кьил Гьажимурад Мусаев фенвай.
Дагъустандин гьукумдин ва муниципалитетрин органрин векилри тухвай затIар «Каспий» батальонда къуллугъзавай аскеррив агакьарна. Абурун арада дронар, пекер чуьхуьдай машинар, холодильникар, махсус месер ва маса затIар авай.
«Нубатдин сеферда чал гьакьван багьа Дагъустандай куьмек агакьнава. Дагъустанвийри аскеррин гьар са тIалабуниз, игьтияждиз фикир гузва.
Чи аскерриз датIана куьмекар гунай заз дагъустанвийриз ва кьилди Сергей Алимовичаз сагърай лугьуз кIанзава. Гъалибвал мукьвал ала, чун гъалиб жеда!», — лагьана атаман Владимир Савченкоди батальонда къуллугъзавай гадайрин тIварцIихъай.
Къейд ийин хьи, Дагъустан, СВО-да авай чи аскерриз куьмекар гунал гьалтайла, кIвенкIвечи чкадал ала. И кардиз Сергей Меликова кьетIен фикир гузва. Къенин йикъалди чи республикади Украинада кьиле физвай махсус серенжемда иштиракзавай аскерриз 10 агъзур тоннралди жуьреба-жуьре затIар рекье тунва.
Чи мухбир
