Муьгъверган виликдай алгъай кIунтIунин чинал чIудгъал-чIудгъал мегъуьн тарар экъечIзавай чкадал алай. Ам адлу хуьрерикай сад тир. Гьар садан кIвале фу-къафун, гьуьрмет авай. Хуьре Ислам диндал амалзавай, ина мискIин кардик квай. Динэгьлийрин арада машгьур фекьияр, къазияр ва алимар хьана.
Кьибледихъай, хуьруьвай са акьван яргъа тушиз, дагъдин зарб, вичел Самур, Самбур, Кьулан вацI тIварар алай вацI авахьзавай. Хуьре Чахчалай, Кркай, Хъартасрикай, Гъепцегьрилай, Филяй, Хивдай, Хутаргъай, Бахцугъай, КIиридай, СтIалдилай, Чепяй, Хиняй атай хизанрини бинеяр кутуна.
Муьгъверган ихьтин тIвар алаз кьве чкадал ерилу хьана: вине ва агъада. Сифтедай, пачагьдин гьукумат жедалди, — вине, гуьгъуьнлай — Урусатдин пачагьлугъдик акатайла, — агъада.
СССР арадал атайла, муьгъверганвийрин яшайишда дегишвилер тIимил хьанач. Кьвед лагьай Муьгъверган арадал атана, сифте алай чкадилай агъада. Ина гьуьжре галай мискIинни эцигна.
Советрин девирда хуьруьн майишатдин министерстводи уьруьшрин бегьерлувал артухарун патал къанавар яна, цIийи идараяр, вацIарал насосрин станцияр эцигна. Муьгъверганвияр патални вацIун кьере насосрин станция кардик кутунвай. Зурба селлер атуникди вацIу вичин шакъаяр дегишна. Нетижада станцияни тухвана, хуьруьнвийри чпин салариз яд гузвай къубуни кардикай хкатна.
Са кьадар вахтар арадай фейила Дагъустандин хуьруьн майишатдин министерстводи цIийи станция эхцигна. Салариз, багълариз ятар гун патал Мегьарамдхуьруьн райондин хейлин уьруьшар целди таъминарзавай, кьилни Муьгъвергандилай къачунвай КОР-дин (къанавдин) къуллугъда Мегьарамдхуьре авай са идара акъвазна. Яни къанав гьадан балансдал эцигна. Адазни, чун ягъалмиш туштIа, «межрайонная ремонтно-эксплуатационная мелиоративная контора» лугьузва. И идаради ихьтин къарар кьабулнава: муьгъверганвияр дигидай целди анжах гьар са салан иесидихъ галаз икьрар кутIунайдалай кьулухъ таъминарда. Икьрардани къалурин: месела, «зи сала 5 сотыхда — картуфар, 2 сотыхда — келемар, 3 сотыхда — помидорар, чичIекар, серкер, хъчар, 2 сотыхда — некьияр, мад 2 сотыхда къелемар ава».
Гьи майвадини набататди гьикьван цикай менфят къачузватIа агрономриз чида. Ремонт авур КОР-дай авахьна физвай цихъ шартIуналди гьа и жуьре акъуднавай гьахъ-гьисабдай муьгъверганвийри винидихъ тIвар кьур идарадиз пул гана кIанзава.
Гьа икI, гьукум гъиле авай бязи гьакимри муьгъверганвийрин салар-багълар пайи-паярнава. Кьуразва анра тарарни. Алай вахтунда базардай маса гузвай майвайрихъ я хъсан ери авач, я хъсан дад. Жуван сала битмишарай майваяр, гьелбетда, хъсан я: картуфдилай гатIунна, афни-помидордал къведалди. Алай вахтунда Муьгъвергандал, бюджетдин такьатар харж ийиз, насосрин станциядихъ гелкъвезва, ам кардик кваз хуьзва, герек хьайила, ремонт ийизва. Чи фикирдалди, станция кардик кутазвай вахт 1-апрелдилай 1-октябрдалди тайинарун бюджетдиз къвезвай пул тIимиларунин мураддалди ийизвач, винидихъ тIвар кьур идарадиз кьезилвилер гун патал ийизва.
Амма и хуьрел йисалай-суз бурж артух жезвайди РД-дин хуьруьн майишатдин ва недай суьрсетдин министерстводини къейд авун, муьгъверганвийрин тайин пай ватандашвилин везифайрикай магьрум авунал гъизвай шартIунал эцигун жезва. Хуьруьнбур, гьелбетда, ихьтин кардихъ, фикирдихъ галаз рази туш. Абур винидихъ тIвар кьур идаради насосрин станцияди кIвалахдай вахт суткада 7 сят, гьафтеда 3 юкъуз тайинарунихъ ва и кардал кьетIен гуьзчивал тешкилунихъ галаз рази я. Эгер ихьтин къайда кардик акатайтIа, чпин салара жуьреба-жуьре емишар, майваяр битмишарзавайбурун кьадарни пара жеда.
Гьуьрметлу «Лезги газетдин» редакция! Чна квевай и макъалада къарагъарнавай месэладин патахъай, республикадин жавабдар идарайрай кар-кьил чирна, кьил-кьилел алай жаваб гьазурун тIалабзава. Ана насосрин станция гьи йикъара ва шумуд сятда кардик кутадатIа къалурун чарасуз я. Сагърай!
Абдулашим Гьажимурадов
