СтIал Сулейманан райондин АПК-да уьзуьмчивили кьилин чка кьазва. Райондин хуьруьн майишатдин карханайрихъ, КФХ-рихъ ва арендаторрихъ, санлай къачурла,  2300 гектардилай виниз уьзуьмлухар ава. КIватI хъийизвай ципицIрин кьадарни йисалай-суз артухарзава. ИкI, 2023-йисуз районда 17037 тонн хьанайтIа, шаз 20237 тонн кIватI хъувуна.

И йикъара чун Эминхуьруьн уьзуьмчивилин са шумуд майишатдиз ва арендадин участокриз фена. Чаз акурвал, Н. Яхьияеван, А. Алагьвердиеван КФХ-рин, арендаторар тир РД-дин хуьруьн майишатдин лайихлу работник А. Агъамирзоеван, Н. Гьамидован, Р. Гьамзатован, М. Мегьамедован участокра уьзуьмлухар хъсан гьалда ава, анра ципицIрин тарифдин бегьер дигмиш жезва. Им, гьелбетда, уьзуьмлухра агротехникадин гьар са серенжем чпин вахтара ва галай-галайвал  кьиле тухунин нетижа я.

КФХ-рин иесийрихъ ва арендаторрихъ алай йисуз чпин кIвачихъ галай уьзуьмлухрин гьар са гектардай 100 центнердилай тIимил тушиз ципицIар кIватI хъийидай фикир ава.

Хазран  Кьасумов